Пентагон денеска најави откажување на посетата на израелскиот министер за одбрана Јоав Галант на Вашингтон, без да ја наведе причината за одлуката од Тел Авив.

„Штотуку бевме информирани дека секретарот Галант ќе го одложи своето патување во Вашингтон“, рече портпаролката на Пентагон Сабрина Синг на брифинг со новинарите.

Како што беше претходно најавено, Галант денеска во Вашингтон се очекуваше да се сретне со американскиот секретар за одбрана Лојд Остин и со американскиот советник за национална безбедност Џејк Саливан.

„Тајмс оф Израел“ објави дека планираната посета била одложена неколку часа пред заминувањето на Галант за Вашингтон во вторникот вечерта, бидејќи премиерот Бенјамин Нетанјаху „поставил услови во последен момент да ја одобри посетата“.

Весникот цитира неколку израелски извештаи во кои се вели дека Нетанјаху ја блокирал посетата на Галант затоа што „сакал да разговара со американскиот претседател Џо Бајден за планираната одмазда на Израел против Иран пред министерот за одбрана да замине во Вашингтон“.

Извештајот на израелскиот канал 12 посочи дека премиерот изјавил дека патувањето ќе биде одобрено само откако владата постигна договор за одговор на иранскиот ракетен напад минатата недела.

Белата куќа, исто така, одби да коментира за откажувањето на посетата, упатувајќи ги сите прашања до израелската влада. И покрај претходните разговори за можен телефонски разговор меѓу Бајден и Нетанјаху од крајот на септември, двајцата лидери се очекува да разговараат денеска поради очекуваниот израелски напад врз Иран, објави денеска Ројтерс.

„Тајмс оф Израел“ наведува дека Нетанјаху и Бајден не разговарале речиси 50 дена, а израелскиот премиер десет дена чека повик од американскиот лидер.