Јапонија објави нов дизајн за пасоши кои ќе бидат достапни од пролет следната година, а целта е да се спречи фалсификување на документот, јавуваат денеска јапонските медиуми.

Фотографијата на пасошот е изработена од пластика и има вграден чип.

-На таа страница од пасошот ќе има симбол на црешовиот цвет, како и посебен воден печат – соопшти јапонското Министерство за надворешни работи.

Пасошите со нов изглед ќе се издаваат од 24 март следната година.

Според извештаите, се очекува да бидат потребни околу две недели подолго за издавање на новите патни исправи отколку што е случај сега, бидејќи новиот дизајн го произведува Националното биро за печатење, кое исто така прави банкноти.

Сега фотографиите од пасошот се печатат во канцелариите на локалната самоуправа и дипломатските претставништва во странство, па Јапонците чекаат околу една недела за нов пасош.