Министерката за образование и наука Весна Јаневска изјави дека очекува да се одобри проект со кој ќе се обезбедат финансии што ќе ја олеснат критичната состојба во која се наоѓа Сеизмолошката опсерваторија, главно поради недостиг на сеизмолошки инструменти и кадар.

Институцијата е во опасност да затвори 13 сеизмолошки станици низ државата, инсталирани од 2023 година како дел од проектот на организацијата ОРФЕУС, поточно по завршувањето на меѓународниот проект „AdriaArray“ на почетокот на 2026 година, поддржан од владата на Германија.

Германската влада ќе ги повлече инструментите кои се круцијални за следење на сеизмичката активност односно просторно-временската застапеност на земјотресите и на нивно место ќе останат застарени, нефункционални модели кои не гарантираат продуктивен работен тек.

Јаневска информираше дека Опсерваторијата конкурирала со проект за научно-истражувачки средства и дека има големи очекувања истиот да биде одобрен.

„Кога ги разгледував апликациите на научно-истражувачките проекти, видов дека Сеизмолошката опсерваторија конкурирала на овој конкурс и, според информациите кои ги добивам од комисијата, многу се големи изгледите тие и да го добијат овој проект, со што ќе се обезбедат дел од средствата за да се набават одреден број инструменти.“, рече Јаневска.

Таа нагласи дека проблемот со кој се соочува опсерваторијата е ургентен и значаен и додаде дека со добиените средства може да се спаси Сеизмолошката опсерваторија.