Пендаровски и официјално е кандидат за претседател предложен од СДСМ откако извршниот одбор на партијата му ја даде поддршката.

Изборот паднал откако за кандидатурата за претседател е спроведена статутарна постапка, но и анкети меѓу членството.

Извршниот одбор во проширен состав го поддржа Пендаровски за кандидат за Претседател на државата и сега го предложи на Централниот одбор на партијата.

„Пендаровски е победнички кандидат, близок со народот, ги споделува прогресивните вредности, со јасна визија за европска иднина на државата“, велат од СДСМ.

Од партијата сметаат дека во досегашниот негов мандат тој успеал даго врати угледот на институцијата, нејзиниот интегритет и кредибилитет.

Пендаровски, велат, покажа што значи да се биде вистински Претседател за сите.

Претходно претседателот на партијата Димитар Ковачевски, во гостување на Сител, прашан зошто можноста за кандидирање на поранешниот министер за внатрешни работи Оливер Спасовски сега се исклучува и дали кризата со пасошите влијаше на тоа, Ковачевски со став дека таа криза не може да се адресира само на еден човек и дека станува збор за процес.

-Оливер Спасовски сепак е еден од поискусните членови на партијата, човек кој многу има направено за СДСМ и тоа не само во време кога извршувал државни функции, туку и партиски, рече актуелниот лидер на партијата.

Во однос на носителите на кандидатските листи во изборните единици и кандидатите за пратеници, тој вели дека СДСМ ќе има носители во сите шест изборни единици, одлуките за тоа ќе ги носат партиските органи, а ќе бидат бирани од редот на истакнати и препознатливи членови на партијата.

Прашан колку пратенички мандати очекува да освои СДСМ на претстојните избори, со оглед на резултатите од анкетите, Ковачевски посочува на анкетите од 2020 година кои покажувале предност на ВМРО-ДПМНЕ, а победила СДСМ и коалицијата.

Смета дека СДСМ и коалицијата на изборите ќе освои повеќе пратенички мандати од опозицијата.