Иселеникот од Австралија, Стефан Георгиевски, кој често е во Битола, денеска го испрска со спреј натписот „Клуб Иван Михајлов“ истакнат на просториите на бугарскиот клуб во градот, кој беше избришан од Централниот регистар.

Тој упати порака до министерот за внатрешни работи Оливер Спасовски дека кога тоа не го направиле надлежните институции, морале да реагираат граѓаните од Битола, со „препорака повеќе да не се отвораат вакви клубови кои ќе носат имиња на докажани фашисти, кои ги караат народите на Македонија и Бугарија“.

Георгиевски не се криеше додека го бришеше името на клубот и тоа го направи во период кога „вриеше“ на Широк Сокак.

Ви исто време, и таблата со натпис „Цар Борис Трети“ е тргната од просториите каде беше сместено истоименото здружение во Охрид, пренесе „Макфакс“.

Здружението денеска беше избришано од Централниот регистар, откако комисија во Министерството за правда утврди дека името не е во согласност со новоизменетиот Закон за здруженија и фондации.