Булдожер придружува пешадија на приодот кон Газа - Фотографија ЕПА, Атеф Сафади

Израелските воени булдожери уриваат сѐ пред себе во Газа: Непробојни „мечиња“ пострашни од тенк

За Палестинците нема пострашна глетка од булдожер „катерпилар д9р“, гигантска машина произведена во Тексас, надградена со челик и железо во Израел. Воопшто не му прилега името „Доби“ (Мече), по кое е препознатлив меѓу Израелците

Немаат топ ниту ракети, но тие се буквално најмоќното и најголемото оружје на израелските копнени сили. Оклопните булдожери се челичниот штит на војската. Неизбежни се на челото на сите израелски воени операции на палестински територии – пробиваат пат за да поминат тенкови, чистат мински полиња, уриваат непријателски фортификации, но и домови.

За Палестинците нема пострашна глетка од булдожер „катерпилар д9р“, гигантска машина произведена во Тексас, надградена со челик и железо во Израел. Воопшто не му прилега името „Доби“ (Мечето), по кое е препознатлив меѓу Израелците. „Мечињата“ се „џелати“ на семејните куќи на секој палестински терорист или бомбаш што извршил напад врз Израелци. Понекогаш ја спроведуваат казната без придружба на други борбени возила, бидејќи и самите се заштитени од непробоен оклоп.

Булдожерите повторно се на челото на колоните од тенкови и борбени возила што во изминатите десетина дена навлегуваат во Газа, во операцијата за која премиерот Бенјамин Нетанјаху вели дека нема да заврши сѐ додека не биде уништен Хамас. Тие први ја пробија оградата, за чија изградба Израел вложи милијарда долари и неколку години работа.

Не се гледаат често на снимките што Израелските одбранбени сили ги споделуваат од операциите во Газа, но тие се незаменливи за чистење на мини на патиштата и за пробивање пат низ урбаните места, низ бетонските урнатини на зградите уништени од израелското бомбардирање. Официјално не се потврдени информациите дека во оваа операција се ангажирани најмалку сто булдожери.

Џинови за диви и урбани џунгли

„Мечињата“ всушност се џинови од 4 метри и тешки 49 тона. Моторот од 410 коњски сили преку гасениците може да ги задвижи до максимална брзина од 11 километри на час, но на дозерот му даваат моќ да повлече 71 тон. Тоа важи за градежната верзија на „катерпилар д9“.

Американците ги користеле овие булдожери во Втората светска војна, а уште поефикасни се покажале во Виетнамската војна, како главно средство на американските инженериски единици за пробивање пат низ џунглите. Американската армија подоцна го претпочиташе помалиот модел „катерпилар д7“, кој има помала моќ, но е и поевтин и полесен за транспорт. Израелците, кои веќе користеле булдожери во Синајската војна, во 1967 година го купиле поголемиот и помоќен „д9“ и го надградиле со уште десет тони оклоп, непробојно стакло, митралез и муниција. „Мечето“ било користено во Шестдневната војна во 1967 година, Јомкипурската војна во 1973 година и во Мир за Галилеја во 1982 година. Без нив, силите на генералот Ариел Шарон немало да можат да го преминат Суецкиот канал и да извојуваат победа во Јомкипурската војна.

За време на Втората интифада неколку „мечиња“ издржале удари на противтенковски ракети и на 100 килограми експлозив, па дури и на половина тон, директно поставен на нивниот оклоп.

Израелски воени булдожери уриваат куќи и пробиваат пат низ Џенин во јули годинава – Фотографија Profimedia

Новата голема надградба била во 2015 година, кога бил вграден уште поцврст оклоп, непробоен не само за куршуми, туку и за противтенковски ракети. Сечилото на челото е уште поголемо и потешко. Кабината за возачот и командирот е дополнително заштитена со непробојно стакло што неутрализира снајперски оган и со решетка што прерано ги активира ракетите.

Овој монструм чини околу 1 милион долари. За споредба, најмодерниот израелски тенк „меркава 4м“ чини околу 3,5 милиони долари, американскиот „абрамс м1“ чини 10 милиони, а рускиот „армата т-14“ околу 4 милиони.

Сее смрт околу себе

Секоја акција на „мечињата“ е проследена со жртви и уништувања. Тие имаа важна улога при операцијата „Леано олово“ во Газа во почетокот на 2009 година, која заврши со вкупно 1.400 загинати луѓе. Во март 2003 година, пак, израелски воен булдожер ја прегази американската мировна активистка Рејчел Кори, која демонстративно се испречила пред куќи на палестински семејства што требало да бидат уништени. Израелската војска спроведе истрага и објави дека возачот воопшто не ја забележал 23-годишната Американка пред сечилото. Нејзините родители водеа долга судска војна против Израел, но во 2012 година ја изгубија правната битка. Судот ги спречи родителите да ја тужат компанијата „Катерпилар“ во Тексас, бидејќи булдожерите му биле продадени на Израел со одлука на владата на САД.

На родителите им преостанало да основаат миротворна фондација што го носи името на нивната ќерка. Фондацијата се огласи веднаш по нападот на Хамас врз Израел на 7 октомври.

– Нема разумно оправдување за злосторствата на Хамас што одзедоа животи на толку многу израелски цивили и погодија многу повеќе – објави фондацијата „Рејчел Кори“, но воедно изрази и „длабока загриженост поради израелските одмазднички напади во кои биле убиени илјадници Палестинци“.

Таткото Крејг Кори изјави за „Телеграф“ дека му е мачно да ги следи вестите за војната во Газа две децении по смртта на неговата ќерка. За него, булдожерите се „убиствени воени машини“.

– Уфрлете во мала брзина и тој ќе пројде низ згради од армиран бетон, уништувајќи сѐ пред себе, дури и луѓе – вели Крејг Кори.

Бригадите Ал Касам на Хамас објавија дека уништиле булдожер во Газа, но тоа не е потврдено од израелските сили ниту е прикажана снимка од уништен монструм. Одбранбени аналитичари укажуваат дека Хамас повеќе се плаши од „мечето“ отколку од тенковите, зашто речиси и да немаат оружје со кое би можеле да му го пробијат оклопот. При ненадејниот напад врз Израел на 7 октомври беа користени дронови што пуштаат експлозив врз извидувачки центри. Со таков дрон беше уништен и тенк „меркава“, по што многу тенкови и булдожери беа надградени со „чадор“ од челик.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот