Израелската армија објави дека воспоставила целосна воздушна контрола над Техеран и дека уништила значаен дел од ракетните капацитети на Иран во последните напади, објавува Би-би-си.

„Постигнавме целосна контрола врз воздушниот простор над Техеран“, изјави бригадниот генерал Ефи Дефрин, портпарол на израелската војска. Во обраќање до медиумите, тој додаде дека од почетокот на израелската операција се уништени повеќе од 120 лансери за ракети земја-земја, што е приближно една третина од вкупниот број што го има на располагање Иран.

Според портпаролoт  на израелската војска, повеќе од 20 лансери биле уништени само за време на синоќешните напади, „неколку минути пред да треба да се користат за испукување ракети кон Израел“.

Дефрин, исто така, рече дека израелските воздухопловни сили извршиле голем бран напади врз околу 100 воени цели во Исфахан, во централен Иран. Околу педесет борбени авиони учествувале во тој напад, чија цел биле магацини за ракети, системи за лансирање и командни центри.

Израел тврди дека овие напади се дел од поширока операција што има за цел трајно да го намали ракетниот капацитет на Иран против израелска територија. Иран сè уште јавно не го потврди обемот на загубите.