Израелскиот министер за одбрана Израел Кац денес изјави дека доколку Хамас не ги ослободи заложниците и не го положи оружјето, Појасот Газа ќе биде уништен.

„Бараме од Хамас само две работи, а тој нема доброволно да ги исполни: да ги ослободи сите заложници и да се разоружа. Големата сила на овој напад е директниот пораз на Хамас, а ова исто така создава поголем притисок за ослободување на заложниците“, рече Кац за време на посетата на седиштето на 162-та дивизија, чии сили моментално дејствуваат во Газа, објавува „Тајмс оф Израел“.

Тој истакна дека Израел сака да ја преземе контролата врз Газа бидејќи денес таа е главен симбол на владеењето на Хамас.

„Денес, ако Газа падне, тие ќе паднат“, рече Кац.

Тој рече дека „браќата убијци Синвар“, Јахја и Мухамед, кои ја водеа терористичката група во Појасот Газа пред Израел да ги елиминира, „ја уништија Газа, и ако Из ал-Дин Хадад (новиот воен водач на Хамас во Газа) продолжи вака, ќе ја уништи и неа“.

„Тие ќе ја платат цената, а Газа ќе биде уништена“, нагласи тој.

Израелските одбранбени сили (ИДФ) објавија дека две дивизии започнале проширени копнени операции во градот Газа, како дел од новата фаза од воената офанзива против Хамас.

Операциите, во кои учествуваат десетици илјади војници, започнаа преку ноќ, додека армијата продолжува да ги проширува своите ударни операции во Газа.

Во претходните недели, израелските сили извршија интензивни воздушни напади врз цели на Хамас, вклучувајќи облакодери, како и копнени операции на периферијата на градот и во западните населби.
Војската соопшти дека 162-та и 98-та дивизија сега ги прошириле операциите во Газа, а се очекува 36-та дивизија да се придружи во наредните денови, додавајќи уште десетици илјади војници.

Воздушните напади се во тек, а копнените трупи на ИДФ влегуваат во нови делови од градот кои сè уште се под контрола на Хамас.

Целта на операцијата е да се опколи Газа и да се ослабат силите на Хамас, кои се проценуваат на неколку илјади борци, додека во областа сè уште има околу 600.000 цивили.

Началникот на Генералштабот на ИДФ, Ејал Замир, лично командува со офанзивата од Јужната команда.
Покрај активните единици, армијата повика околу 60.000 резервисти, додека 70.000 резервисти веќе учествуваат во операциите.