Израелскиот министер и член на Кабинетот за безбедност, Зев Елкин, изјави дека Израел би можел да се закани со анексија на делови од Појасот Газа доколку милитантната група Хамас продолжи да ги опструира преговорите за прекин на огнот. Според него, оваа мерка би можела да послужи како „средство за силен притисок“ врз Хамас, со тоа што би ја загрозила територијата што палестинците ја сметаат за дел од својата идна држава, пишува Ројтерс.

„Најболното нешто за нашиот непријател е губењето на територија. На Хамас треба јасно да му се стави до знаење дека ако си играат со нас, ќе изгубат земја што никогаш нема да ја вратат“, изјави Елкин за јавниот радиодифузер Кан.

Овој коментар доаѓа во време на зголемен меѓународен притисок врз Израел, особено по најавата од Велика Британија дека ќе ја признае палестинската држава во септември, доколку не дојде до напредок во мировните напори и олеснување на страдањата во Газа. Слична изјава минатата недела даде и Франција, а Саудиска Арабија, Египет, Катар и Арапската лига објавија заедничка декларација со предлог-чекори кон спроведување на решението за две држави.

Во меѓувреме, обидите за посредување и постигнување 60-дневен прекин на огнот, кој би вклучувал и ослободување на преостанатите израелски заложници што ги држи Хамас, пропаднаа минатата недела. Двете страни се обвинуваат меѓусебно за неуспехот на преговорите.

Ситуацијата на теренот сè повеќе се влошува. Израел се соочува со критики поради хуманитарната катастрофа што се одвива во Газа, каде што Обединетите нации предупредуваат на најлошо можно сценарио за глад. Според Министерството за здравство на Газа, само во средата се пријавени уште седум смртни случаи поврзани со глад, вклучувајќи и двегодишно девојче со хронична здравствена состојба. Вкупниот број на починати од глад и неухранетост од почетокот на војната се искачи на 154, од кои најмалку 89 се деца.

Израелската војска најави дневни хуманитарни паузи и отворени коридори за доставување храна, но Канцеларијата на ОН за координација на хуманитарни прашања (OCHA) предупредува дека количините на помош што стигнуваат се далеку од доволни.

Во меѓувреме, семејствата на израелските заложници апелираа до меѓународната заедница да не ја признава палестинската држава додека нивните најблиски се уште се во заробеништво. Форумот на семејствата на заложниците изјави дека таквиот потег „не е чекор кон мир, туку опасен морален и политички неуспех што ги легитимира ужасните воени злосторства“.

Премиерот Бенјамин Нетанјаху во вторник ја критикуваше најавата од Велика Британија, велејќи дека тоа е „награда за монструозниот тероризам на Хамас“. Тој претходно изјави дека сака мир со Палестинците, но отфрли можност за целосна палестинска држава, велејќи дека таква држава би можела да биде платформа за уништување на Израел. Според него, контролата врз безбедноста мора да остане во израелски раце.