Во галеријата „Метаноја“ во Скопје, во соработка со Балканскиот институт за вера и култура, на 28 ноември, во 18 часот, ќе биде отворена изложбата „Таен премин кон Месечината“ на Ване Костуранов.

На отворањето на изложбата ќе се обратат рецензентот д-р Коста Милков, директорката на галеријата „Метаноја“, м-р Нада Милкова, и авторот на делата Ване Костуранов.

– Конечното уметничко дело е комплетирано преку „техне“ и „логос“ не во смисла на современиот композит „технологија“, туку во смисла на егзистенцијалната феноменологија. Овие два концепта се неизбежно поврзани на нивото на соодносот меѓу уметничкото (τέχνη) и словесното (λόγος ). Процесот на креативната концептуализација со бои и четка и мисловната концептуализација со зборови и перо овозможуваат артикулација на она што генерички се именува како духовно. Притоа „техне“ ја претставува естетската рефлексивност, а „логос“ ја изразува контемплативната поетичност. Куќичките, дрвјата, патеките, Сонцето и Месечината на Костуранов се уметничка поезија – истакнува рецензентот д-р Коста Милков.

Изложбата „Таен премин кон Месечината“ на Ване Костуранов во галеријата „Метаноја“ ќе трае до крајот на јануари 2024 година.