Отворањето на изложбата на цртежи „Омеѓени приказ(н)и“ од Тони Васиќ ќе се одржи на 19 септември, во 20 часот, во Салон „Империјал 1“ при Културно-информативен центар – Скопје.

Изложбата „Омеѓени приказ(н)и“ на проф. д-р Тони Васиќ е составена од 17 цртежи (70х100 см), избор од серијата од дваесетина цртежи инспирирани од мотивот глуварче. Цртежите се работени на бела хартија, со туш и перце, во време на карантин и изолација од ковид-19 (од 13 март 2020 до 13 септември 2021).

Во текстот со наслов „Ликовниот декамерон на Тони Васиќ: кревки облици, моќни приказни“ поетесата и академик Катица Ќулавкова посочува:

– Првата асоцијација за изолацијата е осамата, тишината, медитацијата, аскетизмот. Таа е ослободување од вишокот комуникација со другите и од информацискиот стрес. Таа е пат кон себе. Таа е свртување на фокусот од феномените кон суштината: од агресивниот колорит кон белината, онаа девствена белина која не ужаснува, туку копнее по допирот со дискретните нијанси на отсјајот на Сонцето, оној флеш на окото и на објективот, оној проблесок на имагинацијата, онаа состојба на хармонија – напиша Ќулавкова.

„Тони Васиќ ги врамува на свој уникатен и својствен начин своите ’рески и црти‘ во ликовни нарации со висок стил. Колку е поминуциозна формата на имагинарните рески на глуварчињата, колку е понеобична кружната егзистенција на глуварчињата, колку се поумерени контрастите, колку се поинвентивни наративните поенти (геометриски, колоритни, технички), колку се поризични комбинациите од типот ’слика-во-слика‘, толку е попривлечен естетскиот амбиент на цртежите, толку е посилна фасцинацијата. Оти не може да не бидеме фасцинирани од ’простата и сложена‘ форма на глуварчето, преобразена во ликовни дела изведени до совршенство, а такви се цртежите од серијалот на Тони Васиќ“, додава Ќулавкова.

Изложбата ќе биде отворена до 3 октомври, а настанот е финансиран од Град Скопје и е дел од проектот „Скопје кандидат за Европска престолнина на културата 2028“.

Тони Васиќ (1966, Скопје) дипломирал на Факултетот за ликовни уметности – Скопје, Универзитет „Св. Кирил и Методиј“ во 1991 година; магистрирал графика на Факултетот за ликовни уметности – Скопје, Универзитет „Св. Кирил и Методиј“ во 2002; одбранил Докторат на Институтот за културолошки студии, Универзитет „Евро-Балкан“, Скопје, во 2016 година.

Во периодот од 1988 до 2023 година учествувал на повеќе од 500 национални и меѓународни групни изложби во Србија, Хрватска, Словенија, Бугарија, Унгарија, Јапонија, Кореја, БиХ, Франција, Германија, Белгија, Полска, Романија, Холандија, Литванија и др. Добитник е на 13 награди за уметност и дизајн. Работи како професор на Факултетот за архитектура и дизајн на Универзитетот „Американ колеџ“ во Скопје. Член на ДЛУМ е од 1991 година.