Културно-информативниот центар – Скопје ја почнува есенската низа културни настани со самостојната ликовна изложба „Линиски одрази“ од Филип Перески, која ќе биде отворена на 4 септември, во 20 часот, во Продажен ликовен салон на КИЦ – Скопје.

– Академскиот уметник Филип Перески ликовно ги истражува бескрајните можности и начини со коишто инвентивно ги реконтекстуализира – линијата врз дводимензионалната површина и формата во тридимензионалниот простор. Неговиот цртеж и сликарство се одликува со спонтани искривени линии коишто асоцираат на органски и динамични облици. Во апстрактно-асоцијативните композиции доминира активниот однос и слободната креативна игра меѓу ликовните елементи во просторот: контраст и градација на линијата и бојата.

Со хоризонталното протегнување и вертикалното извишување, брзите градации и збиената густина на линиите, уметникот изразува енергична динамичност и хаотичност во слободните отворени композиции. Имено, преку репетиција на експресивните контрастни и збиени линии, тој дополнително креира длабочина во асиметричните композиции.

Во скулптурата, Перески ја искривува и раскршува линијата создавајќи минималистички геометриски форми со „полна“ маса и мрежно испреплетени „празни“ колоритни интервенции. Ослободувајќи ја композицијата од геометриска строгост, автентичниот ликовен јазик на академскиот уметник Филип Перески спонтано еволуира и се развива во апстрактно-асоцијативен израз – напиша м-р Викторија Димеска, историчар на уметност, во текстот со наслов „Линија, форма и простор“.

Филип Перески е роден на 10.09.1990 во Прилеп. Дипломира во 2013 година на Факултетот за ликовни уметности во Скопје, на катедрата за ликовна педагогија, насока вајарство во класата на професор Станко Павлески. Член е на друштвото на ликовни уметници Прилеп (ДЛУП). Моментално живее и работи како наставник по ликовно образование во Прилеп. Неговата изложба во Скопје ќе биде отворена до 16 септември.