Здружението за развој на култура и заштита на културното наследство „Контекст – Струмица“ во барот „Нагоре“ ја реализира изложбата на цртежи „Не е комплицирано“ на Кирчо Арсовски од Куманово. Изложбата е отворена на 20 јануари и ќе биде поставена еден месец.

Станува збор за втора изложба од проектот „Ѕид на уметноста“, со кој струмичани имаат можност да се запознаат со уште еден од уметниците во Македонија кои создаваат авангардна и неконвенционална уметност. Изложбата е продажна, а на неа се претставени 30 дела.

Самиот проект има за цел да претстави уметници од државата кои создаваат минијатури, цртежи, графики, кроки-скици и дела со помал формат, кои не секогаш успеваат да бидат презентирани во поголеми простори или галерии.

Во официјалниот текст за изложбата, Митко Гогов од „Контекст – Струмица“ забележува: „Кирчо Арсовски е еден од најдобрите поп андерграунд автори во Македонија. Медиумот што го претставува е инфантилен, што би рекле тинејџерски. Претставува политички и сексуални фрустрации, а опусот и тематика му се препознатливи, баш поради тоа што користи евтини материјали, а неговиот израз и лесното поп изразување не е тенденциозно, традиционално, ниту претенциозно, баш како во музиката на ТБ ’Трачери‘. Тој е лесен во цртањето како во гитарското перце, со неколку ликовни рифови прави како што големите мајстори покриваат огромни платнени површини.“

(Текстот е објавен во „Културен печат“ број 163, во печатеното издание на весникот „Слободен печат“ на 21-22 јануари 2023)