Собранието денеска на седница го изгласа Законот за забрана на нефер трговски практики предложен од Министерството за економија, со кој се очекува да се намалат цените во маркетите преку регулирање на синџирот на снабдување со земјоделски и прехранбени производи.

Според дел од експертите, невозможни се брзи резултати од овој закон. Тие за „Слободен печат“ велат дека  на граѓаните не треба да им се ветува дека  преку ноќ ќе се спасат од нелогичните поскапувања на храната. Законот не се донесува директно за потрошувачите, туку го уредува бизнис-синџирот – земјоделци – доверители – трговци, а потрошувачите се само во споредна улога.

– Првите ефекти нема да бидат поскоро од крајот на годината. Целата постапка е задоцнета и има дупки за пополнување. Затоа и инсистиравме да останат мерките за замрзнување на цените на храната, барем додека Законот не го види светлото на денот – велат од Организацијата на потрошувачи.

Кога нема чувар во трговската џунгла, цените ќе дивеат!

Претходно, вицепремиерот за економски прашања, Фатмир Битиќи изјави дека овој закон е системско решение според ЕУ директиви.

– Секако, законот е системско решение, решение коешто сме го немале и го немале никаде во Европа, е ново решение според ЕУ-директивите и мислам дека конечно ќе значи правиот пат којшто сите го бараме, а тоа е патот кон европската интеграција. Ваквите решенија укажуваат што е доброто на нашето интегрирање во ЕУ, рече Битиќи на новинарско прашање.

Битиќи: Законот за забрана на нефер трговски практики е системско решение според ЕУ директиви