Со 27 гласа „за“ денеска, на претпоследниот ден од годината, беше изгласан буџетот на општина Тетово за 2025-та. Овој пат, за буџетот гласаа и советниците од редовите на ДУИ, пренесува ТВ21. Според раководителот на Секторот за финансии на општината, буџетот за следната година изнесува 49,3 милиони евра, заедно со финансиската помош што ја дава Владата од унгарскиот заем. Градоначалникот Биљал Касами неодамна најави дека општината предвидела 40.000 евра за т.н. „албанска академија“, во главниот финансиски документ тие пари не се среќаваат, туку само 50 илјади евра предвидени за културни активности и спорт.

„Буџетот за 2025 година ќе биде развоен буџет, што е највисокиот буџет што некогаш го изгласал советот на општина Тетово, а ако на овој буџет се додадат и проектите кои се очекува да бидат одобрени од Владата за 2025 година, т.н. унгарскиот заем, вкупниот буџет ќе биде 49,3 милиони евра. Општина Тетово за капитални инвестиции издвои 16,3 милиони евра. За 2025 година се предвидени повеќе од 50.000 евра за спорт и култура, но не е прецизирано за што ќе се делат истите“, изјави Нуредин Дехари од финансискиот сектор.

Иако советниците од ДУИ гласаа за буџетот, партијата преку соопштение ја обвинија Општина Тетово за злоупотреба и нереализирање на проектите што биле ветени.

„Прашања за дискусија и сомнежите за корупција во секторот урбанизам за селективно давање одобренија за градба. Ова е јавна тајна за која се зборува во секој агол на Тетово. Ветувањата кои беа дадени за жичарата во Попова Шапка, изградбата на подземни и надземни паркинзи, промената и реконструкцијата на центарот на градот, изградбата на градскиот стадион, продолжувањето на патот Благоја Тоска, изградбата на четири базени, четири нови училишта… не беа исполнети и ни во овој буџет не се планирани за реализација,“ велат од ДУИ-Тетово.

Инаку, општина Тетово од унгарскиот заем ќе треба да добие 11,5 милиони евра. Касами најави ново средно училиште, нова водоводна мрежа, како и изградба на неколку патишта и канализација.