Од вкупно 13 пристигнати трудови на конкурсот за идејно решение за новата управна зграда на Општина Центар, стручната комисија составена од претставници на релевантни институции од струката, образовни институции од областа, како и стручни лица од општинската администрација, избра три најуспешни идејни архитектонски решенија, информираа од Општината.

Првата награда е доделена за идејното решение под шифрата „НАМАТ“ на авторите Нина Карангелеска-Тодоровска, Сара Ничота, Милена Шундовска Четелева и Кристијан Ристовски.

Втората награда ја доби проектот под шифра „ЧКЛАБ“ на „Платформа“ ДОО Скопје, со авторите Емил Јегени, Елена Икономов, Веле Богоевски, Јасна Милојковиќ Муратовска, Ана Галевска Момировска, Јосиф Николовски, Ѓоре Миров и Матеа Јегени.

Треторангирано е архитектонското решение под шифра „СЦЕНА“ на Митко Хаџи-Пуља, Никола Стрезовски, Христина Саљамовска-Трајкова и Теодора Илиевска.

За најдобрите решенија се доделени и награди и тоа за прво место 750.000 денари, 400.000 денари за второто и 300.000 за третото место.

Избраните три решенија поставуваат темел за изградба на современа и функционална зграда која ќе ги задоволи потребите на граѓаните и администрацијата, истакна градоначалникот Горан Герасимовски.

Со изградбата на планираниот нов комплекс, старите бараки ќе се заменат со современ објект за општинската администрација, а локалните жители ќе добијат функционален простор. Проектот вклучува изградба на подземен паркинг со околу 300 паркинг места и простор за 100 велосипеди, што ќе го реши проблемот со паркирањето во околината.