Судскиот совет денеска избра 25 судии кои ќе судат во седум суда во државата. Сите новоизбрани судии, како што истакнаа членовите на Судскиот совет, се избрани според постигнувањата и освоените поени и на тестирањата што ги спроведе Академијата за судии и обвинители и на тестирањата и проверките што ги спроведе комисијата за избор на судии на Судскиот совет. Членовите на Советот не штедеа пофалби за идните судии и им посакаа многу успех во работата.

Во Основниот кривичен суд Скопје од 13 пријавени кандидати се избрани седумте најдобро рангирани и тоа: Марија Беговиќ, Билјана Смаќовска, Драгана Исаковска, Драган Јосифовски, Ахмет Идризи, Фросина Стојановска и Кирил Георгиев. Во Основниот граѓански суд се избрани осум судии: Кристијан Митревски, Симона Бубевска Муцунски, Лилјана Костојчиновска, Драган Петрушевски, Маја Костелиќ, Андреја Апосотолска Малиновска, Пајтим Машкули и Јордан Јованов.

По двата распишани огласа во април и во мај, пополнети се и четири судијски места во Основниот суд Битола. Таму новоизбрани судии се Петар Чаловски, Елена Журовска, Горан Димовски и Иван Колевски. За судот во Свети Николе за судија е избрана Драгана Илиовска, а за судот во Струмица Катерина Тодорова. Новоизбрани судии за судот во Тетово се Бојана Тоиќ и Муса Реџеп, а во Струмица Билјана Иванова и Костадин Георгиев.

– Честитам за успешно организираниот и спроведен процес. Честитки за сите избрани судии. Ова е многу потребно за судството, познато е дека недостасуваат судии. Ова е нова енергија за подмладено и европско судство – рече претседателот на Судскиот совет Сашко Георгиевски.

Новоизбраните судии ќе почнат со работа на 15 август, по летната судска ферија.

По двата огласа останале петмина завршени кандидати од Академијата за судии и обвинители. Судскиот совет најави дека многу брзо ќе распише огласи за пополнување и на другите празни судиски места.

На денешната седница беше констатирано и дека судијските Лилјана Крстевска од граѓанскиот суд во Скопје и Слаѓана Илиевска од тетовскит суд ги исполниле условите за старосна пензија со што им престанува судиската функција.