Со 10 гласа „за“ и два „против“, но и жестоки обвинувања за кршење на Законот за судови затоа што не е избран судија со најмногу бодови, туку единаесетта по ред, Судскиот совет ја избра судијката Даниела Димовска за вршител на должност претседател на најголемиот кривичен суд во земјава, каде се судат најголемите и најбитните предмети и каде ќе се води предметот за трагедијата во Кочани.

Координаторот за овој суд, Данка Ристова, ја предложи Димовска, повикувајќи се на Деловникот на Судскиот совет. Таа се повика на нејасна процедура и се повика на Деловникот, подзаконски акт кој ја регулира работата на Судскиот совет и предложи позитивно оценета судијка, иако сите судии во Кривичен биле така оценети, а Законот за Судски совет предвидува да се избере судија со најмногу бодови.

„Во случај на разрешување или престанок на мандатот на претседателот на судот, до избор на нов претседател на судот, Судскиот совет на Република Македонија од редот на судиите во судот определува вршител на должноста претседател на судот кој во последната година е оценет со највисока позитивна оцена и во однос на останатите судии има добиено најголем број бодови“ вели овој член од Законот за судовите.

Единаесеттата судијка на „ранг-листа“ стана ВД претседателка на Кривичен суд

– Уште во подготовките беше спорна и самата процедура за избор на в.д. претседател. Во Законот за судови, во членот 89, е предвидено дека Судскиот совет од редот на судиите во Судот определува вршител на должност претседател на судот, кој во последната година е оценет со највисока позитивна оценка и во однос на останатите судии има најголем број на бодови. Во однос на Законот за судски совет да појаснам дека во овој дел немаме точно одредби за процедурата за определување на в.д. претседател, но за ова очигледно претходно е утврдено дека постојат некои недоследности. Ги немаме овие процедури добро разработено, во самиот Деловник за работа за Судскиот совет, член 24 став 2 е наведено дека во случај на разрешување или престанок на мандатот на претседател на суд, до избор на претседател на нов суд Советот без одлагање од редот на судиите во судот кои се позитивно оценети од Советот, определува вршител на должност претседател на судот. Овие одредби како координатор ми беа основата за на кој начин да оди процедурата избор. Законот за судски совет е донесен покасно, во соработка со ЕУ – рече Ристова.

Таа објаснуваше и дека сега оценувањето се врши на четири години и немаат оценка на судиите од последната година и рече дека овие закони ќе треба да се усогласат.

Најмногу пофални зборови за судијката имаше членот на Судскиот совет Антоанета Димовска која и била менторка и ја опиша како личност која и невозможното може да го направи возможно.

– Нејзиното досие и биографија укажуваат, и лично сум имала контакти, дека ќе одговори со нејзините способности менаџерски способности. И бев ментор координатор кога ја заврши академијата, лично сум запозната со нејзиното си – ви. Одржуваме близок контакт успешен судија, кога дојде во судот нејзе и недостасуваше само судско искуство. Се работи за личност со исклучителни менаџерски способности, брзо мисли, практично, се издвојува и има волја – рече Димовска.

На ова жестоко реагираше членот на Судски Тања Чачарова Илиевска и порача дека се крши . Според неа, членот 89 изрично пропишува дека се бира судијата со најмногу бодови порача дека се крши Законот за судови.

– Не гледам зошто тоа што сте биле и ментор, за вас е критериум за да прескокнеме десет судии во тој суд со поголем број на бодови од тој кандидат и да одиме на 11 зашто има одлични менаџерски способности – рече Илиевска која гласаше против.

Според Чачарова – Илиевска оценувањето од последните четири години важи и сега и порачува дека нема потреба од вонредно оценување.

– Само во исклучителни ситуации кога имаме унапредување Судскиот совет врши вондредно оценување. Не се согласувам (со Ристова) дека в.д. претседател е унапредување, тоа е една ад хок ситуација. Нема потреба од вонредно оценување туку важат оценките од последното оценување – рече Чачарова-Илиевска.

Таа беше децидна дека повикувајќи се на Деловникот се дерогираат законски одредби, иако Законот има поголема правна сила од подзаконските акти.

Веднаш по изборот на Димовска жестоко реагираше и судијата од Кривичниот суд Ненад Савески, кој лично на Антоанета Димовска и порача да си оди и дека во име на судиите го крши Законот.

– Одете си од тамо Веднаш и престанете да штетите на судиите! Брука си ! Брука за судиите и за вашето семејство во кое сите се правници! Како гласате за кандидат на кој сте му биле ментор? Има судир на интереси! Вака ли сте ги учеле колегите како ментор ? Да се кршат закони? Одете си веднаш од Судскиот совет и од судството Срамота брука резил си ! Имате ли срам? Ти се обраќам тебе бидејќи ти си таму со гласовите на овој суд за кој гласаш незаконита одлука! Немаш право на тоа! Немаш ниту кредибилитет тамо да седиш, како ќе цениш дали некој судија постапил законито или не? Нема место веќе за демагогиите за кои постојано зборите во Судски совет и на други настани, а до збор од тебе не може да се дојде! На колку судии им го нарушивте угледот со вашите демагогии, а вие всушност го немате, го згазивте и вашиот углед. Постојано го окупирате просторот дека си долгогодишен судија, па ова ли е вашето искуство флагрантно кршење закон? Јас бев еден од тие кои внимателно го слушав секој ваш збор, па и ти верував што го сметам за свој пораз и грешка! Оди си ! Ако не си одиш ќе одат судиите кои вредат , кои не ја трпат калта со која прскате – порачува судијата во порака до Димовска во која увид имаше „Слободен печат“.

Судијата Савески со жестока порака до Димовска за изборот на ВД претседател – Кој ви даде право во наше име да кршите Закон?

Пред седницата претседателот на Судскиот совет Александар Камбовски рече дека откако ќе се избере ВД претседател на Кривичен, ќе се распише оглас, но бидејќи најави вонредно оценување на судиите рече дека процедурата за избор на редовен претседател на Кривичен ќе потрае неколку месеци. Тој всушност го дели истиот став со своите колешки Ристова и Димовска.

– Веднаш ќе објавиме оглас, координаторот очекувам да предложи кандидат за ВД претседател, го имавме предвид Законот за судовите, Законот за судски совет, деловникот кој го имаме за работа. Според законот за судови се бира највисокорангираниот од последната година меѓутоа имаме мала неусогласеност со закон за судски совет бидејќи тоа е понов закони оценувањето се врши на секои четири години така да сега ние за последнава година немаме податоци за ниеден судија. Вонредно треба да ги оценуваме сите тоа е еден процес кој ќе потрае и ќе се доведеме во ситуација три, четири месеци да немаме никаков вршител на должност на судот – рече Камбовски.

Димовска беше избрана за ВД претседател откако досегашниот Иван Џолев беше унапреден за судија во Апелациониот суд и вчера даде свечена изјава. Заедно со него изјава дадоа и сопругата на советникот на премиерот Марија Клетничка Марковска, Оља Ристова, Бетим Јахја. Судијката Димовска последно беше актуелна откако на градоначалникот на Карпош, Стевче Јакимовски му досуди три години затвор. Свечена изјава даде и претседателот на Врховниот суд Африм Фидани.

Пред седницата претседателот на Судскиот совет Александар Камбовски рече дека процедурата за избор на редовен претседател на Кривичен ќе потрае неколку месеци.

– Веднаш ќе објавиме оглас, координаторот очекувам да предложи кандидат за в.д. претседател, го имавме предвид Законот за судовите, Законот за судски совет, Деловникот кој го имаме за работа. Според Законот за судови, се бира највисокорангираниот од последната година, меѓутоа имаме мала неусогласеност со закон за судски совет, бидејќи тоа е понов закон и оценувањето се врши на секои четири години така што сега ние за последнава година немаме податоци за ниеден судија. Вонредно треба да ги оценуваме сите, тоа е еден процес кој ќе потрае и ќе се доведеме во ситуација три-четири месеци да немаме никаков вршител на должност на судот – рече Камбовски.

Судијката Димовска беше актуелна откако на градоначалникот на Карпош, Стевче Јакимовски му досуди три години затвор.