Ивановски успешно ги почна квалификациите на Челинџер турнирот во Загреб
Калин Ивановски со победа ги почна квалификациите на Челинџер 75 турнирот во Загреб, Хрватска, што се игра за награден фонд од 91.250 евра.
Препорачано
Македонскиот тенисер во денешниот прв меч од квалификациите на централниот терен го победи Ерги Киркин од Турција, осмиот носител во квалификациите со 2:1 во сетови 6:3, 5:7 и 6:1 за два часа и 40 минути игра.
Двајцата тенисери на почетокот од мечот имаа проблем со реализација на својот сервис, па така во првите пет гема имаше и пет брејка, а Ивановски водеше со 3:2 во гемови. Во деветтиот гем македонскиот тенисер направи уште еден брејк за 6:3 во гемови и водство за 1:0 во сетови.
Добрата игра нашиот тенисер ја продолжи и во вториот сет поведе со 3:1 во гемови откако имаше брејк во четвртиот гем од сетот, за потоа да има предност од 4:1 и 5:2 во гемови. Но, потоа во деветиот гем на свој сервис не успеа да го освои гемот за 6:4. Веднаш потоа на сервис на противникот ја имаше и првата меч топка, но не ја реализираше и Киркин успеа да ја продолжи низата од освоени гемови (вкупно пет) и сетот го доби со 7:5 во гемови.
Во решавачкиот сет неизвесно беше на почетокот односно до 1:1 во гемови. Ивановски потоа направи два брејка за 3:1 и 5:1 во гемови и сетот го заврши на убедлив начин со 6:1.
Во текот на мечот скорот на поени беше 106:87, а Македонецот постојано беше тој што ја диктираше играта во мечот. За пласман на главниот турнир Ивановски утре во финалето од квалификациите ќе игра со победникот од мечот Даниел Михалски (Полска) и Мирза Башиќ (Босна и Херцеговина).
