Работата на брод за крстарење стана популарна поради високата заработувачка. Но, сите што го искусиле работењето на брод потврдуваат дека оваа работа има две страни. Ивана Милиќевиќ, 25-годишна студентка од Ниш, во интервју за српски „Мондо“ ги опишала своите искуства и сите не се баш одлични.

Таа вели дека покрај пари, работата на брод носи и предизвици, особено за младите девојки кои, како што истакна, често се принудени да се бранат од непристојни понуди, наметливи туристи, колеги под дејство на алкохол, за кои машки -женските односи се единствената забава.

„Ми здодеа во Србија да работам надвор од мојата професија и малку да заработувам, па одлучив да ги спакувам куферите и да не се враќам. Бродот ми изгледаше како добра опција за заработка, иако таму слушнав различни искуства“, открила таа и опишала:

„Кога ги гледам сликите на нашите девојки од Мајами, Бахамите или Карибите, сè ми изгледа идилично, како на филм. Како да живеат врвен живот и многу се забавуваат. Сето тоа изгледаше како добро искуство и можност за мене. Бидејќи се плашам од височина, не сакав да бидам стјуардеса, туку избрав работа на брод“, рекла таа.

Постојано патувала, го видела половина свет и заработката била навистина добра. Меѓутоа, работата била потешка отколку што можело да замисли, вели оваа девојка.

„Работев во велнес центар, но набрзо сфатив дека покрај работата како масер и физиотерапевт, ќе морам да работам и многу дополнителни работи. Тие вклучуваат носење крпи за перење, пеглање и чистење.

Многу колешки добија отказ затоа што го напуштиле работното место за да одат во тоалет, на пет минути. Кога работите на голем брод, се случува да мора да пешачите 10 минути до местото каде што јадете, па во тоа ви поминуваат сите паузи. Но, сето ова е подносливо затоа што знаете дека од тие пари можете да купите стан за година-две“, вели Ивана Милиќевиќ.

Она за што никој не размислува е фактот дека практично ќе бидете заробени со неколку стотици луѓе. Мора да бидете љубезни со нив и да им служите, вие не сте гостин, но тие се.

„Убаво е што патуваме и што се добро сме платени, запознавам неверојатни места и луѓе. Тоа го олеснува фактот што спијам во соба без прозорци и што ми се слошува секогаш кога има големи бури. Кабините се премали, имаат кревети на спрат и мала бања која најчесто ја делите. Но, луѓето со кои се зближувате прават да се чувствувате помалку осамени. Сепак, дури и по работа, практично немате каде да бегате“, вели таа.

Сепак, она што најмногу гја изненадило е односот на мажите, особено гостите и странските туристи, кон девојките вработени на бродот. Како што вели, голем дел од нив имале „непристојни понуди“ и се однесувале како тоа да е „најнормална работа“.

„Ме нервираа гостите коишто доаѓаа, бидејќи често беа арогантни богаташи кои на брод доаѓаа за да се забавуваат. Мажите кои доаѓаа со сопруги или беа постари, ни приоѓаа без никаков срам, претпоставувам мислејќи дека на тоа имаат право. Еден гостин отворено ми се додворуваше пред неговата сопруга и ќерка, а јас морав да бидам професионална. Доживеав постари луѓе да ми се внесуваат в лице и да ме канат во нивната кабина без никаков срам. Многу девојки имаа таков проблем. Кон келнерите и келнерките се однесуваат како да се занимаваат со проституција“, вели оваа девојка. 

„Многу вработени навистина го сфаќаат бродот за крстарење како забава, секој со секого спие и по извесно време тоа навистина може да ве полуди. Бидејќи сите многу работат, кога работата ќе заврши, станува хаос. На многумина единствено им е забавно со кого ќе бидат идната вечер, бидејќи нема излегување од бродот. Се случувало на некој странец да му исчезне сопругата, а подоцна да биде пронајдена во собата на некои мажи. Ми се чини дека моралот тука не значи ништо, како за туристите, така и за голем број вработени кои така се опуштаат, иако тоа всушност не го прават во реалниот живот на копно. Понекогаш мислам дека сите се таму како во некое реално шоу“, вели таа.

Има и такви кои се вљубиле на бродот, иако дома имаат семејства. Тоа се вистински паралелни врски кои траат со години и тоа за сите е сосема нормално.

„Претпоставувам дека луѓето не можат да поднесат да бидат сами и само да работат, па си олеснуваат да издржат година или две на брод. Навистина, атмосферата е многу чудна, сите сте постојано во истото простор заедно, што значи јадете во ист ресторан, пиете во исти барови. Секако, има и парови кои остануваат заедно и сето тоа завршува со брак, особено меѓу луѓе од различни земји“, објаснува Ивана.