Марио Драги пред малку изјави дека ќе се повлече од премиерската функција, откако партија од неговата владејачка коалиција не учествуваше во гласањето за доверба на неговата влада, јави „Ла Република“.

„Попладнево ќе ја поднесам мојата оставка до претседателот на Италија“ му рекол Драги на неговиот кабинет, се вели во соопштението на партијата.

Драги изјави дека „Коалицијата за национално единство“ која досега ја водеше земјата, веќе „не постои“.

Гласањето за доверба стана нов проблем кој ги зголеми тензиите во владата на Драги, во време кога коалициските партии се подготвуваа да се борат меѓусебно на националните избори што треба да се одржат до почетокот на 2023 година.

Одлуката на коалициската партија 5-ѕвезди да го бојкотира гласањето за доверба ја стави Италија во политичка неизвесност и ризикуваше да ги поткопа напорите за обезбедување милијарди евра од фондовите на Европската унија за справувањето со штетната суша и намалувањето на нејзината зависност од рускиот гас, пишува Ројтерс.

Драги претходно изјави дека не планира да ја води Владата без партијата 5-ѕвезди, која се постави како најголема партија на претходните избори во 2018 година, но оттогаш загуби голем број поддржувачи.

Ова значи дека во Италија може да има избори во септември или октомври, откако останатите коалициски партии рекоа дека треба да има гласање доколку партијата 5-ѕвезди не е веќе дел од Владата.

Дали Марио Драги уште има „сè што е потребно“?