Жителите на еден мал град во Тоскана се возбудени поради новите тврдења дека дел од заднината на најпознатиот портрет на светот – Мона Лиза на Леонардо да Винчи, му припаѓа на нивниот град, пишува „Гардијан“.

Италијанскиот историчар Силвано Винчити не се сомнева во тоа дека Да Винчи го насликал мостот Ромито ди Латерина во провинцијата Арецо во пејзажот зад загадочната фигура на Мона Лиза.

Да Винчи го насликал портретот во Фиренца, на почетокот на 16 век, а идентитетот на жената во ремек-делото, за која се верува дека е Лиза дел Џакондо, е актуелна тема и ден-денес.

Според некои теории, мостот во заднина е Понте Буриано, во близина на Латерина, додека други веруваат дека тоа е Понте Бобио во Пјаченца. Од друга страна, Винчети, користејќи историски документи, фотографии и снимки од дрон, дошол до заклучок дека станува збор за етрурско-римскиот мост Ромито.

Stone bridge in background of Mona Lisa is uncovered as a Tuscany beauty spot pic.twitter.com/j9vZh7YbQ4

— DTN NEWS (@DTNNEWUpdates) May 4, 2023

Најочигледен детаљ, вели тој, е бројот на сводовите – четири. Понте Буриано има шест, додека Понте Бобио има уште повеќе. До денес, само еден лак на мостот Ромито, кој се протега на реката Арно, е останат недопрен.

Документите на семејството Медичи, пронајдени во архивите, покажуваат дека помеѓу 1501 и 1503 година мостот бил многу зафатен со сообраќај. Винчети навел дека токму во тој период Да Винчи престојувал во областа. Прво во служба на кардиналот Чезаре Борџија, а потоа и на Пјеро Содерини, државник од Фиренца.

Со мерење на ширината помеѓу речните брегови и користење на должината на преостанатиот лак на мостот, италијанскиот историчар утврдил дека биле потребни точно четири свода за да се премости реката.