Италија, по минатогодишните екстремно сушни периоди и нискиот водостој на северот од земјата, назначи вонреден комесар за борба против сушата, кој ќе се грижи да се обезбеди соработка со сите засегнати сектори, пренесе агенцијата АНСА, објави Политика рс. 100 милиони евра ќе има за воведување вонредни мерки во пет региони.

По минатогодишната голема суша, Италија забележа понизок водостој во многу езера и реки, особено на северот. И покрај тоа што последните денови има врнежи, експертите предупредуваат на недостиг на вода во текот на летото што може да влијае на земјоделството и туризмот.

Во голем дел од Европската унија, минатата година ќе остане запаметена како екстремно сува, а во некои области состојбата беше алармантна.

Речиси половина од територијата на ЕУ беше во опасност од тешка и долготрајна суша што ги намали придобивките во производството на храна. Франција, Романија и Унгарија и неколку медитерански региони – вклучувајќи ги Италија, Шпанија и јужна Грција – беа најзагрозени.

Летните приноси најмногу претрпеа во регионите веќе погодени од долгорочните дефицити на дождови, како што се големи делови од Шпанија, јужна Франција, централна и северна Италија. Според податоците на италијанскиот земјоделски синдикат „Колдирети“, минатогодишната суша загрозила повеќе од 30 отсто од земјоделското производство во земјата и половина од фармите, особено оние каде што се произведува најпознатата шунка од Парма.