На северот од островот Итака е направено извонредно археолошко откритие што го поврзува хеленистичкиот комплекс во близина на селото Екзоги со легендарниот херој Одисеј. Истражувањата на Универзитетот од Јанина открија значајни остатоци и материјални докази што фрлаат ново светло врз историјата и културното наследство на островот, за кој се верува дека е домот на славниот јунак од „Одисеја“, пишува „Јуроњуз“.

Локалитетот познат како „Училиштето на Хомер“ се наоѓа во зелена и богата со извори област, во подножјето на с. Екзоги. На него се пронајдени остатоци од две ридести платформи поврзани со камени скали, меѓу кои доминира кула од III век пр.н.е. и голема правоаголна градба.

Најстарите траги од човечка активност потекнуваат од неолитот (крајот на 5. и почетокот на 4. милениум пр.н.е.), вклучувајќи кремени алатки и фрагменти од керамика. Од бронзеното време се идентификувани делови од над 30 садови, датирани во доцниот 14. и 13. век пр.н.е.

Еден од највпечатливите наоди е подземна цистерна со необичен камен ѕид, за која археолозите сметаат дека потекнува од микенскиот период. Во неа се пронајдени и делови од валчести микенски печати, што дополнително го зајакнува тоа тврдење. Се претпоставува дека на тоа место постоела населба која имала надзорна и управна улога врз пристаништето и богатите извори на вода.

Главниот период на развој на локалитетот е хеленистичкиот и рано-римскиот (од III век пр.н.е. до II век н.е.), кога просторот бил богато украсен со резбани архитектонски елементи и ниќи за култни прикажувања. Идентификувани се повеќе вотивни дарови, златен и бронзен накит, како и над 100 монети од различни градови, што укажува на значаен проток на посетители – веројатно аџии.

Најголемата сензација меѓу наодите се натписи и фрагменти од керамика со врежано името на Одисеј, што го поврзува локалитетот со култот на славниот херој. Овие натписи, во комбинација со други откритија, како бронзена биста и резолуција од 207 г. пр.н.е. во која се спомнуваат свечености посветени на Одисеј, укажуваат дека на Итака навистина постоело светилиште посветено на него.

Истражувачите веруваат дека комплексот имал важна верска, општествена и можеби дури и политичка улога на островот. Просторот веројатно бил центар на култна активност и место за аџилак, каде што се одржувале ритуали, игри и собири во чест на херојот.

Од Општина Итака велат дека во соработка со Министерството за култура, Заводот за заштита на споменици на Кефалонија-Итака и Универзитетот од Јанина ќе направат сè за да ги заштитат и промовираат овие значајни откритија.

„Планираме и научни и едукативни настани за граѓаните и туристите да ја почувствуваат важноста на откритијата. Итака нè инспирира и денес – нејзината земја зборува, потсетувајќи нè на богатството на нашето минато“, стои во соопштението.