Новак Ѓоковиќ се пласираше во третото коло на Мастерсот во Шангај, совладувајќи го искусниот Хрват Марин Чилиќ со 7-6 и 6-4, во меч кој влезе во историјата како „најстар“ дуел досега одигран на еден Мастерс турнир — со вкупно 75 години на теренот (Ѓоковиќ 37, Чилиќ 38).

Првиот сет понуди голема борба и израмнета игра. Чилиќ имаше две брејк шанси при 5-5, но не успеа да ги искористи, па сетот се решаваше во тај-брејк. Таму Ѓоковиќ беше поефикасен и со убедливи 7-2 го освои првиот сет.

Во вториот сет, клучен беше еден брејк на српскиот тенисер. Тој го одржа водството и при 5-4 одбрани уште две брејк топки за да стигне до победата.

Ова беше 22-ри меѓусебен дуел меѓу двајцата ветерани, а Ѓоковиќ води убедливо со 20-2. Во следното коло, Новак ќе игра против Германецот Јаник Ханфман, кој е 159. на АТП листата.

Преземено од: Спорт.ком.мк