Властите од Перу ѝ го испорачале на Словенија осомничениот криминалец Лука Фурлан, баран за обид за убиство, кој дури 23 години се криел во јужноамериканската држава, јавија словенечките медиуми.

Како што изјави Андреј Облак, портпарол на Окружниот суд во Нова Горица, Лука Фурлан бил испорачан на Божиќ (25 декември) минатата година по завршувањето на сите официјални процедури и оттогаш е во притвор во родната земја.

Фурлан е обвинет дека во 2002 година бил вклучен во престрелка меѓу две криминални групи на пат во централна Словенија. Тогаш никој не бил повреден, но куршуми оштетиле неколку прозорци на околни куќи.

Судот во Нова Горица по него распишал налог за апсење, но Фурлан ѝ избегал на полицијата и отишол во Перу, каде се криел безмалку 23 години. Перуанската полиција го уапсила во главниот град Лима лани во февруари.

Додека Фурлан бил во бегство, застареле две од трите обвиненија против него – за предизвикување општа опасност и за недозволено поседување оружје. Тој сега ќе одговара само по обвинението за обид за убиство.