Модната дизајнерка Тања Кокев повеќе од 15 години успешно ја гради својата модна приказна. Кокев е една од водечките дизајнери во македонската мода и дефинитивно омилена на домашните политичарки, но и на јавните личности. Неодамна претстави прекрасна модна ревија за која сѐ уште се зборува. Но, кога ќе се изгасат рефлекторите, Тања е мајка, жена… Зборуваме за модата, за разводот, дали сѐ уште верува во љубовта, за нејзината ќерка Клара која чека моден ангажман во Загреб, зборуваме и по нешто за естетските корекции, ботокс и филери и дали жената може да ја зачува убавината без овие работи.

Важиш за една од најпознатите модни дизајнерки кај нас, колку беше тежок патот да се стане познато име во оваа работа? Како почна твојата модна приказна?

– Бев релативно млада, на возраст од 31 година. Станав претприемач и основач и имав добар бизнис на многу рана возраст. Но, никогаш не ги научив школските правила. Секогаш го користев мојот инстинкт, кој е веројатно мојот најголем квалитет и мојата најголема грешка.
Јас не сум добар менаџер, но имам страст и сила на основач и затоа можам да направам работите да се случат. Следната голема лекција што ја научив за себе, многу рано во животот, е дека најважната врска е онаа што ја имаш со себе. Ако го сфатите тоа, секоја друга врска е плус и не е задолжителна. Мислам дека најважно е да веруваш во она што го правиш. Не можете да лажирате јасност. Кога немате јасност, немате ништо. Нема подобро чувство од она кога се крева маглата.

Се сеќавам на времето кога дизајнираше само венчаници, но многу брзо се слушна за твоето име. Што беше пресудно?

– Мислам дека ги познавам жените и ги сакам, секако. Никогаш во жена професионално не гледам конкуренција, само емпатија. Се радувам на успехот на секоја жена, повеќе од успехот на еден маж. Знам што сакаат и кога нештото ќе го сакаат. Затоа, речиси секој модел од моите колекции им намигнува на жените.
Некој многу паметен еднаш ми рече дека карактерот е единственото нешто што не можат да ти го одземат. Можеш да го изгубиш здравјето, богатството, сè, дури и слободата, но никогаш не го губиш карактерот.
Освен мојата љубов за креирање за жените и мојот карактер, не ми текнува на нешто друго што би било поважно и пресудно за Кокев.

Неодамна одржа модна ревија на која ја престави колекцијата за новата сезона. Како помина модната ревија и со што се претстави Кокев овој пат?

– Сѐ беше во рацете на врвниот Дејан Пројковски. Режисер што ги собра сите награди во регионот и без кој не би можела да замислам да правам настан. Музиката беше избор на одличниот диџеј Дарко Марковски. Од мелодии со ĸласичен занесен грув, до музиĸа за танцување, преку дисĸо и фанĸ ера до класични бас линии, за на крај ревијата да заврши со техно-ĸласиĸата „Мадам Холивуд“, ĸоја зборува за гламурот и за површноста, каде што лесно може да се изгубите во преĸумерност и слава.

Што беше инспирација за новата колекција? Која беше пораката што сакаше да ја пратиш со новата колекција?

– Зимска идила, снежни пејзажи и магична атмосфера што ја носи зимата. Користејќи сè од боите на снегот, мразот и небесно сината, креиравме модели што ја носат зимската приказна. Од класичниот кашмир до модерните шик кроеви, секој дизајн е внимателно изработен со цел да ја истакне вашата индивидуалност и да ве заштити од студот. Зимата е време за уживање во природата и во претстојните празници. Си поигравме и со божиќните бои за да ја заокружиме целата приказна околу зимската магија. Боите на оваа колекција се вдишуваат со зимската атмосфера – од класичните црни, бели и сиви до топлите нијанси на кафе и греено црвено вино.

Имаат ли Македонките чувство за мода?

– Мислам дека чувството за мода има најголема врска со самодовербата и дали знаеш што ти прилега. Можете ли да лажирате дека сте самоуверени? Не. Тоа е најлошото затоа што тогаш изгледате како идиот. Треба да си верувате. Тоа е најважното нешто. За да си верувате, треба да имате врска со себе. За да имате врска со себе, треба да бидете строги кон себе, а не да бидете во заблуда. Сè се враќа на истото.

Која е идеалната комбинација за една жена, особено кога „не знае што да облече“?

– Елегантно и секси без многу напор. Мислам дека зборот без напор е многу важен. Создава леснотија и самодоверба. Нема ништо поубаво од жена што чекори самоуверено и лесно.

Те плаши ли стареењето и што мислиш за естетските корекции, филери, ботокс? Може ли жената да ја зачува својата убавина без овие работи?

– Ништо повеќе не ја старее жената отколку да се преправа дека е сè уште млада. Жената мора грациозно да старее и да не се обидува да биде на возраст во која не е или ќе изгледа смешно. Ботоксот и филерите се добредојдени, но многу внимателно дозирани и без менување на личниот опис. Немам ништо против убава и негувана кожа, но имам против екстремни промени, големи усни, неприродни вилици и слично. Тоа се сериозни ментални нарушувања доколку посакаш такви промени на себе.
Не ме плаши стареењето воопшто. Ако ме прашаш кога сум била најсреќна, ќе одговорам сега. Се надевам дека и на 60 и на 70 години ќе го имам истиот одговор. Секогаш би рекла сега. Освен моите 20-ти. Во моите 20-ти не бев секогаш најсреќна, но ако сте ме прашале тогаш, веројатно би рекла дека сум.

По разводот со сопругот, дали продолжи да веруваш во љубовта и во бракот?

– Да бидеш со еден маж цел живот, таа идеја ми изгледа восхитувачки, сè додека не е само од рамнодушност или од економски причини. Но, кога сте искрени со себе, многу е тешко да останете со истата личност цел живот. Се бара голема толеранција и интелигенција за да не се разделите. На пример, да се прифати дека успехот на жената не треба да се толкува како напад врз мажот.
Јас ја видов таа љубомора кај мој партнер, кој ме прекорувал што премногу работам и многу се трудам. Тоа е класична критика, но никој не го критикуваше Реноар – кој сликаше секој ден до својата смрт. Но, сепак не им пречи работата, им пречи неаргументираното чувство на инфериорност, кои сами си го додаваат.
И да одговорам на прашањето, да секако дека верувам во љубов, верувам и во брак. Многу ми пречи зборот нормално, дека е нормално ако си во брак, тоа е некоја разумна љубов. Не сме сите скроени да бидеме разумни. За мене ниедна љубов не е разумна. Не верувам во разумна љубов.

Тогаш, каков е твојот љубовен живот?

– Пред сѐ, ме води радоста на живеењето – и тоа не е површна радост, бидејќи е поврзана со нешто многу длабоко. Тоа е многу лична работа, знаете… сингл или не сингл, тоа не е навистина важно. Само мислам дека е важно да не се губите себеси во врските. Мора да знаете кој сте и да бидете верни на тоа. Најважниот однос е оној што го имате со себе. Ако го негувате тоа, сè друго ќе напредува.
Мора да се учи од сопствените успеси и неуспеси и да ги претворите лошите работи во добри, тогаш ќе имате доверба во себе и верба во љубов.
За мене најважно е да бидам покрај човек кој е искрен, непретенциозен, и да не е лажливец. Со таков човек и грешката можам да ја простам. Животот е патување. Тоа е како воз. Пејзажите се менуваат. Луѓето влегуваат, луѓето заминуваат. Важно е со кого ќе ги гледаш пејзажите по пат.

Неверојатно е колку личите со твојата ќерка Клара. Често е дел од модните ревии. Се гледаш ли себеси во неа? Колку сте блиски и дали со неа можеш отворено да зборуваш за сè?

– Така сите велат, дека личиме. Но, ние сме толку слични, а толку различни.
Клара е четврта година во „Орце Николов“ и во моментов се подготвува за студии во Белград. Ќе студира моден дизајн и моден бизнис. Потпиша договор со агенција од Загреб како модел и ги чекаме првите ангажмани.
Нема тема што не сме ја прочешлале заедно. Знаеме сѐ една за друга, не знаеме поинаку. Горда сум на неа, пред сѐ на нејзината скромност. И, сметам дека токму таа нејзина доблест ќе ја однесе на вистинската позиција во светот на модата. И ќе биде многу подобар дизајнер од мене.

Се ближат празниците. Каде ќе ја прославиш Нова година? Што е твојот совет за дамите, што да облечат за новогодишната ноќ?

– Дневна журка во „Радио Бар“, моето омилено место во градов. Потоа се губам неколку денови на бања. Во Скопје одамна е изгубен новогодишниот шарм, така што мојот совет нема да биде во согласност со условите.