Дел од „античка“ фонтана со месеци стои фрлена блиску Порта Македонија, па на скопјани им се погоди како корпа за отпадоци. Оставена е на патеката што води од Портата до ГТЦ, на локација каде редовно има туристи, кои можат да се уверат во сите „убавини“ на Скопје.

И не само што ја извадија и ја оставија, иако за неа се потрошени пари за поставување, туку никому не му текнува барем одвреме навреме да го исчисти ѓубрето насобрано во неа, иако сега веќе наликува на мини депонија преполна со ситни отпадоци и пластични шишиња.

Не се знае чија неодговорност е поголема – на локалните власти, на комуналците или на граѓаните, кои иако знаат дека нејзината намена не е да биде контејнер за ѓубре, сепак безгрижно си фрлаат во неа.

Така ќе биде сѐ додека конечно не почне да се применува Законот за јавна чистота и да се изрекуваат казните предвидени во него, затоа што очигледно е дека без казни свеста и одговорноста тешко „проработуваат“.