На целиот потег од Карпош 1 до поликлиника „Букурешт“ покрај булеварот Партизански Одреди нема ниту една корпа за ситни отпадоци. Па така, граѓаните кои се движат по патеката покрај булеварот доколку користат хартиени марамчиња или седнат на клупа со намера да одморат, да се освежат или да „грицнат“ нешто, опаковките од пијалокот, хартијата од храната или опушоците од цигари ќе мора да си ги понесат со себе во потрага по најблиската корпа. Првата ќе ја најдат дури кај поликлиниката, а следната кај ТЦ „Лептокарија“, каде пак можат да се забележат и празни држачи каде некогаш имало закачено корпи.

Иста е ситуацијата и на автобуската постојка кај хотел „Карпош“ каде граѓаните ситното ѓубре ќе мора да си го стават во џеб или во чанта и со автобус да си го однесат до дома.

Од другата страна на булеварот состојбата е малку подобра, па на овој потег можат да се најдат две-три корпи во не баш добра кондиција.

Карпошани се прашуваат каде исчезнаа корпите што беа поставени заедно со металните клупи пред неколку години.

Не ми е јасно што се случи. Значи на овој потег на секој 50 – 100 метри беа поставени по две клупи, а до нив канта за отпадоци. Одеднаш исчезнаа. Да се искршени или оштетени ќе ги видевме, но едноставно ги нема. Украдени ли се, комуналците ли ги тргнале, никому не му е јасно. Но вака не е во ред. После се жалат луѓето фрлале отпадоци по улици. Епа фрлаат, нема секој култура ниту навика да си го носи ѓубрето во џеб и да бара канта низ градов – вели Александар, жител на населбата.

На прашањето што се случи со корпите за ситни отпадоци покрај Партизанска во Карпош и дали од некаква причина ги повлекле од ЈП „Комунална хигиена“, оттаму тврдат дека такво нешто не се случило.

Ниту една од корпите за ситни отпадоци поставени во општината Карпош, долж булеварот Партизански Одреди, не се повлечени од страна на ЈП „Комунална хигиена“- Скопје. Напротив, ЈП „Комунална хигиена“ неодамна изврши замена на оштетените корпи со нови, и тоа: во општината Карпош се заменети 13 корпи за ситни отпадоци, во општината Сарај се заменети 7 корпи, во општината Ѓорче Петров се заменети 6 и во општината Центар се заменети 5 корпи за ситни отпадоци – велат од Претпријатието.

Урбанистичката опрема е нешто што е дел од нормалното функционирање на кој било град. Низ Скопје граѓаните многупати се сведоци дека по улиците нема доволен број корпи, дека дел од нив се искршени, без дно или оштетени. Нивното навремено заменување е еден од условите, покрај редовното празнење на контејнерите за комунален отпад, за да се одржува основната хигиена на јавните површини.

Па затоа, доколку „Комунална хигиена“ не ги однела корпите и не знае што се случило со нив, доколку не знае дека недостасуваат, ги потсетуваме да проверат и да постават нови. За граѓаните се навистина потребни.