Со помош на мрежа од компании и посредници, поранешното раководство на државната енергетска компанија ЕСМ дозволило да се трошат државни пари за поскап јаглен, во интерес на некои компании и бизнис-моќници со силни политички врски, кои енергетската криза ја искористиле за богатење врз грбот на граѓаните, кои плаќаа високи сметки за струја, открива истражување на ИРЛ во кое се вели дека братот на поранешниот премиер Зоран Заев, Вице Заев, преку негова бугарска фирма наплатил девет милиони евра од државните набавки на јаглен за термоцентралите.

Фирмата на Вице Заев, во бизнисот од кој профитирале десетина компании, влегла од втор план, односно била ангажирана од компанијата „Зобек мајнинг“ чиј сопственик е македонскиот државјанин Енис Колашинац и која имала добиено договор за набавка на јаглен за домашните енергетски капацитети со државната компанија ЕСМ. Според ИРЛ, делот од колачот од набавките на јаглен што ЕСМ ги склучила од 2022 до денес за да ги обезбеди домашните електрани со енергенси за стабилно производство, кој завршил кај бугарска фирма во сопственост на Вице Заев, изнесувал девет милиони евра.

Тоа било дел од набавките во вкупна вредност од 283 милиони евра, кои државната ЕСМ ги потрошила за оваа намена од 2022 година до денес. ЕСМ склучила договори со 11 фирми за набавка на околу 4,6 милиони тони јаглен. Заобиколувајќи го Законот за јавни набавки, кој дозволува исклучок бидејќи станува збор за набавка на енергија или гориво, преку јавни огласи за РЕК „Битола“ биле склучени 15 договори за набавка на јаглен со единаесетте различни компании. Потоа биле склучувани и анекси за промена на количините, местото за набавка и цената. Во една од овие зделки, девет милиони евра завршиле кај бугарската фирма на Вице Заев, „Гомасидра“, која како и повеќе други фирми на семејството Заеви, е регистрирана на иста адреса во Петрич, покажува истражувањето.

Целиот текст на ИРЛ