Иран се надева дека американскиот претседател Доналд Трамп ќе се согласи на нов нуклеарен договор, изјави иранскиот потпретседател за стратешки прашања Мохамед Џавад Зариф во средата на Светскиот економски форум во Давос.

Запрашан дали Иран верува дека САД би можеле да се согласат на нов договор, Зариф рече: „Се надевам дека овој пат „Трамп 2.0“ ќе биде посериозен, пофокусиран, пореален“.

Трамп еднострано се повлече од нуклеарниот договор со Иран во 2018 година, за време на неговиот прв мандат, и воведе нови, строги санкции врз него.

Спорот за иранската нуклеарна програма повторно ескалира во последните месеци.

По критиките од Меѓународната агенција за атомска енергија (МААЕ), Техеран во ноември објави дека планира да лансира илјадници нови центрифуги за збогатување ураниум.

Иран моментално збогатува ураниум до 60 проценти. Според експертите, за нуклеарно оружје тоа мора да биде збогатено на повеќе од 90 проценти.

Израелската влада често се заканува дека ќе ги бомбардира иранските нуклеарни постројки.