Портпаролката на иранската влада, Фатеме Мохаџерани, денес изјави дека Техеран нема пристап до збогатен ураниум откако Израел и САД ги бомбардираа нуклеарните постројки на земјата во јуни.

Таа додаде дека одлуката за повлекување од Договорот за неширење на нуклеарно оружје (JCPOA) ќе зависи од раководството на режимот. Таа, исто така, рече дека соработката меѓу Иран и МААЕ, во рамките на новиот закон усвоен од парламентот, продолжува преку преговори и мониторинг, објавува Ал Арабија.

Техеран ја прекина соработката со Меѓународната агенција за атомска енергија по војната, која Израел ја започна на 13 јуни, која вклучуваше бомбардирање на нуклеарни и воени постројки и станбени области, што резултираше со смрт на повеќе од илјада луѓе.

На крајот на август, Франција, Велика Британија и Германија го активираа таканаречениот „механизам за брз одговор“, кој овозможува повторно воведување на санкциите на ОН против Техеран во согласност со нуклеарниот договор од 2015 година.

Египетскиот министер за надворешни работи, Бадр Абдел Ати, денес ја нагласи важноста на континуираните напори за отворање пат за постигнување решение меѓу Иран и Меѓународната агенција за атомска енергија (МААЕ), што би придонело за смирување на ситуацијата, враќање на довербата и создавање клима поволна за регионална безбедност и стабилност.