Портпаролот на иранското Министерство за надворешни работи, Саид Катибзадех денеска демантираше дека Иран извршил напад со дрон врз нафтен танкер во близина на брегот на Оман.

Таквите обвинувања не се нешто ново. Тие кои се одговрони за тоа (нападот), се тие кои им овозможија на израелскиот режим да биде присутен во овој регион. Не е чудно што добро познатото антииранско лоби во САД ја користи секоја можност да ја обвини Исламска Република Иран, посочи Катибзадех.

Тоа е прва официјална изјава од Техеран откако израелскиот преммиер Нафтали Бенет вчера го обвини Иран за напад врз танкерот „Мерсер стрит”.

Бродот „Мерсер стрит” на компанијата „Зодијак маритим”, во сопственост на израелскиот милијардер Ејал Офер, пловеше под знамето на Либерија, кога на 29 јули беше нападнат во територијалните води на Оман.

И шефот на израелската дипломатија, Jаир Лапид за инцидентот го обвини „иранскиот тероризам”.

– Иран не е само израелски проблем, тој е извозник на тероризам, разурнување и нестабилност, што е на штета на сите. Светот не смее да молчи пред иранскиот тероризам што и штети на слободната пловидба, истакна вчера Лапид.

Бродот беше нападнат од беспилотно летало, а по инцидентот со американска поморска придружба се упати кон безбедна локација.

Дел од израелските медиуми објавија дека според проценките на службите биле извршени два напада врз танкерот во рок од неколку часа. Првиот напад предизвика штета, а при вториот напад бил погоден командниот мост, при што загинаа двајца морнари.

Изминатите месеци Техеран и Тел Авив повеќе пати се обвинуваа за напади врз бродови.