Техеран потпиша договор вреден 25 милијарди долари со руската државна компанија за нуклеарна енергија „Росатом“ за изградба на четири нуклеарни централи во Иран, објави иранската новинска агенција ИРНА, пренесува Ројтерс.

„Росатом“ во средата, објави дека потпишал меморандум за разбирање за изградба на мали нуклеарни централи во Иран, без да го открие бројот.

Договорот го потпишаа шефот на „Росатом“, Алексеј Лихачев, и највисокиот ирански функционер за нуклеарна енергија, Мохамед Еслами, за време на состанокот во Москва.

„Росатом“ го опиша договорот како „стратешки проект“.

Еслами, кој е и потпретседател на Иран, изјави за иранските државни медиуми претходно оваа недела дека планот предвидува изградба на осум нуклеарни централи, бидејќи Техеран се стреми да обезбеди 20 гигавати капацитет за нуклеарна енергија до 2040 година.