Кандидатот за градоначалник на Град Скопје од редовите на Левица, Амар Мециновиќ, објави дека во неговиот тим се приклучува инженерот Дејан Димовски, кој има долгогодишно искуство како раководител за електромашинско одржување, техничко следење и мониторинг во ЈП „Водовод и канализација“.

Со оваа одлука, како што наведуваат од тимот на Мециновиќ, јасно се става до знаење дека еден од главните фокуси на Левица во Скопје ќе биде решавањето на хроничните проблеми со водоснабдувањето во градот, како и воспоставување на силни и ефикасни јавни претпријатија, целосно ослободени од влијанија на приватни интереси.

Оваа објава доаѓа по претходните повици на кандидатот на Левица до Скопјани активно да се приклучат во движењето за подобро Скопје и заедничко решавање на проблемите од секојдневието. Како што изјави тој, уште во првите 24 часа од објавата на кандидатурата почнале да се приклучуваат активисти и експерти од различни области.