На улицата Венјамин Мачуковски во општина Аеродром, приватен инвестирот од утрово незаконски сече дрва на парцела за градба. Од „Зелен хуман град“ информираа дека добиле поплаки од граѓани за оваа локација, која претходно била оградена за подготовка за градење нова зграда. Оттаму велат дека имаат потврда од Град Скопје дека тие не издале дозвола за интервенција врз децениското зеленило на парцелата и дека без таква дозвола не смее да се сечат, да се пресадуваат и да се кастрат дрвјата. На терен, како што тврдат, излегол и градски инспектор, кој ја констатирал состојбата.

Ова утро, инвеститорот започнал со масакр на дрвјата и другото зеленило на парцелата, иако нема дозвола за истото од Градот. Децениски стари дрвја што имаат непроценлива вредност за животната средина, уништени за нова зграда да никне на нивно место. ЗХГ повторно реагираше кај надлежниот инспекторат што сега е на терен, и известени сме дека инвеститорот „Елена Лука“ ќе биде казнети според Законот за урбано зеленило. За жал, законот предвидува максимална казна од 1.800 ЕУР, без разлика на бројот на исечени дрвја, што е смешна сума за секој инвеститор и воопшто не ги обесхрабрува да го прекршат истиот тој закон – велат од „Зелен хуман град“.

Од граѓанската иницијатива сметаат дека само со притисок од локалното население можат да се спасат останатите дрвја на парцелата што уште не се уништени од инвеститорот.

Аеродромци, не дозволувајте профитот на една фирма да ви го одземе правото на чист воздух, термална заштита и здрава животна средина – апелираат од ЗХГ.

Ова е второ уништување на зеленилото во општина Аеродром во период од неколку месеци. Изминатиот септември аеродромци излегоа на протест во обид да ја спречат најавената сеча на дрвјата поради проширувањето на улицата Васко Карангелевски. Но, од Град Скопје тогаш тврдеа дека по завршувањето на изградбата и пробивањето на улицата и нејзиното поврзување со булеварот Трета македонска бригада ќе биде засаден дрворед од повеќегодишни високостеблести садници по должината на целата улица, со што речиси тројно ќе се зголеми зеленилото по должината на улицата.

Два месеци подоцна, во декември, дрвјата ги снема од улицата Васко Карангелески во Аеродром. Тогаш ниту од Град Скопје, ниту од ЈП „Паркови зеленило“ не одговорија што се случи со дрвјата и дали се засадени на друго место.

Граѓаните сепак се надеваат и очекуваат дека по завршувањето на работите, Град Скопје ќе го исполни ветеното и дека долж улицата ќе има трипати повеќе зеленило од претходно.