Мејкап артистката и пејачка Зорица Матијашиќ, или позната како Зои Блаж, веќе две години живее во Германија. Таа замина поради ракометниот ангажман на нејзиниот сопруг Тадеј Матијашиќ. Во интервјуто за „Слободен печат“ ни раскажа за животот во Германија, за љубовта со Тадеј, по нешто за музиката и желбата еден ден да отвори свој салон…

Веќе две години си во Германија. Во кој град живеете и што е карактеристично за местото во кое живеете?

– Ние живееме во мало село наречено Зул, но Тадеј потпиша нов договор и летово се селиме во нов град близу Берлин. Зул е планинско место и е во близина на Оберхоф, каде што се oдржуваат зимски скокови.

Не е тајна дека замина поради љубовта со Тадеј, но колку беше тешко на почетокот да се навикнеш на новата средина? Дали го прифати германскиот начин на живот?

– Искрено, сѐ уште се привикнувам, многу ми беше тешко кога дојдов, не познавав никој и плус не знаев јазик. Овде животот е многу монотон, работа-дома, а ние навикнати на сосема друго, но да бидам искрена, доста шетаме и тоа некако почна да ме опушта.

Верувам дека си имала моменти на тага и осаменост во новата средина. Како ги надминуваше?

– Имав, да, па дури еден период бев и доста во депресија, само плачев и не гледав добар пат, но подоцна запознав пријатели и некако почнав да ја прифаќам новата средина, како и да сфаќам дека сѐ ова е менливо, но е и дел од животот.

Учиш ли германски, како ти оди?

– Да, почнав да учам од пред извесно време, искрено доста и сум знаела, но бидејќи постојано сум опкружена со наши луѓе, не го забележував тоа. Тежок е јазикот, но имам мотивација и желба да го научам.

Што најмногу ти недостасува и дали доаѓате во Македонија?

– Моите, внук ми, другарките и храната. Набрзо доаѓаме во Македонија, гледаме еднаш до двапати годишно да дојдеме, иако јас бев и пред еден месец за роденденот на внук ми, па со нетрпение чекам да си дојдеме и да уживаме.

Кога веќе замина поради љубовта, како почна љубовната приказна со Тадеј, како се запознавте и со што те освои?

– Сосема случајно на социјалните мрежи, веднаш кога го видов, знаев дека тој ќе ми биде сопруг, имав такво чувство, внатрешната убавина би рекла е на прво место, нормално и надворешната убавина е важна, како и тоа што е различен од другите. Заедно сме речиси осум години и се надевам ќе остариме заедно.

На јавноста ѝ стана позната прво како пејачка. Зошто се повлече од музиката?

– Музиката е моја прва љубов, тоа и имам завршено, но некако го надраснав тоа, а јас сум човек што сака да истражува, да менува работа, но да е поврзано со уметност. Сега си пеам за душа и за пријателите и тоа многу ме прави среќна.

Сепак, се занимаваш со професионално шминкање… од каде љубовта и кога откри дека имаш талент за ова?

– Од дете сакав да шминкам, уживав во тоа и знаев дека еден ден ќе биде моја примарна професија. Најпрво ги шминкав другарките, роднините и пријателките на мајка ми и постојано ми велеа зошто не почнам да се занимавам со шминкање, но некако и не бев подготвена, а и немав самодоверба. Потоа, сосема спонтано почнав да се занимавам со шминкање и траеше цели шест години во Македонија. Од мојот салон излегоа многу насмеани жени и тоа ми го разубави животот – кога со малку можеш да направиш среќен некој е најубавото нешто.

Успеа ли во новата средина да се занимаваш со шминкање или барем дали размислуваш да се обидеш?

– За жал, не, бидејќи не знам да зборувам убаво германски, но се надевам за брзо ќе ми се оствари таа желба, па и да отворам овде еден салон. Чекор по чекор, не сакам да брзам, но знам дека ќе успеам.

Ако направиш споредба, кој има повеќе смисла за мода, Македонките или Германките?

– Е, ова ќе биде најкраток одговор (хахаха), има и средени Германки, но 90 отсто воопшто не се… Ние, луѓето од Балканот, се издвојуваме со сѐ овде. Мода, убавина, нега, апсолутно со сѐ!