Воислав Синадиноски, поранешен репрезентативец и алпски скијач од Гостивар, честопати влегува во студените води на реката Радика. Вели дека тоа е еден вид терапија, како за телото, така и за душата. Студената вода не му пречи, туку го смирува овој 23-годишен фитнес тренер.

– Веќе неколку години практикувам туширање со ладна вода, потопување во вода со мраз и пливање во ладна вода барем четири пати неделно. Јас оваа техника ја применувам поради неколку придобивки: намалување и одржување на низок процент на телесни масти, природно зголемување на тестостерон и воедно физички перформанс, хормонален баланс и зголемено лачење на хормонот на среќа – серотонин, кој најинтензивно се лачи во првите неколку минути по завршувањето на ладната терапија – објаснува Синадиноски.

Тој е основач на платформата за иновативен фитнес, па со него зборуваме за сите позитивни страни на фитнесот, за кој Синадиноски вели дека наједноставно може да се опише како начин на живот.

– Иако фитнесот забрзано се развива низ целиот свет и има сѐ повеќе достапни податоци за сѐ што е поврзано со фитнесот (тренинг, исхрана, суплементација), мислам дека луѓето никогаш не биле позбунети во врска со тоа што значи правилен начин на исхрана и тренинг. Можеби звучи контрадикторно, но сѐ поголемата база на достапни податоци на темата „фитнес“ прави повеќе лошо отколку добро. Зошто?! Затоа што најголем дел од тие податоци се невистинити, делумно точни или претставуваат некаков тип на маркетинг – вели Воислав Синадиноски.

Во разговорот тој објаснува зошто е добар фитнесот, давајќи вистински совети за сите кои сакаат да вежбаат, рекреативно или да го наметнат вежбањето како начин на живот.

– Како прв совет сакам да кажам дека секој што сака да започне со некаков тип на тренинг и исхрана, тоа треба да го прави со професионалец, а не на своја рака, барем одреден период. Живееме во време кога секој втор е „фитнес тренер“ или „нутриционист“. Не го бирајте тренерот или нутриционистот според нивниот број на следачи на социјални мрежи, учеството на натпревари по бодибилдинг или фитнес или нивниот моментален изглед, туку според нивото на познавање на природните науки и човековото тело, затоа што фитнесот е комплексна наука и не се состои само од покажување на вежби. Заблуда е тоа дека треба да се тренира секој ден. Со правилен пристап доволни се 2-3 часа тренинг неделно, комбинација на тежински и аеробен тренинг, за да се постигнат подобри резултати од оние што вежбаат секој ден – открива Синадиноски.

Тој вели дека тренингот нема да помогне само во подобрување на физичкиот изглед, туку првенствено ќе го подобри здравјето и квалитетот на живот. Ќе имате значајно намален ризик од хронични и дегенеративни заболувања и значајно зголемена функционалност.

– Што се однесува до начинот на исхрана, јас лично 8 години ги јадам речиси истите работи ден за ден, без некои големи отстапки. Балансираната исхрана, односно внес на сите типови на протеини, јаглехидрати и масти е според мене најидеалниот начин на исхрана. Не ги поддржувам рестриктивните начини на исхрана каде што се исфрла цела група на макронутриенти (кето, исхрана со низок процент на масти), освен во одредени здравствени состојби – советува фитнес-тренерот.

Што се однесува до суплементацијата, таа е последна по важност, затоа што е само додаток во исхраната.

– Би рекол дека само неколку суплементи се навистина неопходни и корисни, би ги одвоил креатин монохидрат, таурин, омега 3, витамин д3, магнезиум и протеински суплемент доколку не можете да внесете доволно протеин преку исхраната. Многумина се прашуваат што е совршено тело? Совршено е многу субјективен поим, кој секој различно го толкува, за мене совршено тело е она коешто е ментално способно да се избори со предизвиците и „болестите“ на модерното општество, а физички да биде доволно здраво и активно за да ја задржи функционалноста до длабоката старост – заклучува Синдиноски.