Во интервјуто за „Слободен печат“ зборуваме со поп-пејачот Виктор Апостоловски, за музиката, почетоците, работата како водител и уредник на забавната програма во телевизијата Вистинска, за времето кога беше ѕвезда во шоуто „Идол“, за бракот и љубовта со Милена, предизвиците во животот…

Изминатиов период почесто те гледаме како водител. Од каде идејата за емисијата „Лабаво“ и дали си задоволен од гледаноста?

– Искрено, секогаш сум сакал да направам ваква лабава емисија, каде што ќе можам да си поканам мои гости, да правиме опуштен муабет, да свириме опуштена музика и едноставно да уживаме. Ми беше понудена позицијата уредник на забавна програма во новата телевизија која се отвори и со задоволство прифатив. Тоа подоцна ми даде слобода да ја креирам емисијата „Лабаво“. Веќе сме на половина на втората сезона, досега сум имал голем број познати артисти, млади артисти, музичари…

Сепак, твојата најголема љубов е музиката. Како си на тоа поле и дали ќе има некои новитети?

– Новитети има секогаш! А има и веќе стари песни на кои никако да им дојде ред. Единствен проблем во овај период од животот е како да најдам време да направам сѐ што сакам. Како и да е, со сигурност можам да најавам нова песна и спот оваа пролет, па за понатаму ќе видиме.

Кога се појави првпат на сцената на „Идол“, од оваа дистанца сега, тешко ли беше да се наметнеш на домашната музичка сцена?

– За жал или за среќа, иако не бев победник на „Идол“, многумина тоа го памтат како нешто што ме одбележа. Веројатно поради тоа што јас сум еден од малкутемин кои константно работат овие 14 години. А наметнувањето на музичката сцена беше неосетно, некако преку ноќ, бидејќи сите што бевме таму, во тој момент бевме најбараните луѓе, а сè уште немавме ниту една снимена песна. Затоа, по шоуто некако наеднаш се случи еден мрак на музиката во Македонија, што направи наредните години да бидат мошне тешки за опстанок, особено ако за тој опстанок се бориш комплетно сам. Без продукции, без спонзори, без ништо. Не дека сум немал понуди, туку по свој избор. И тоа е можеби најдоброто нешто што можеше да ми се случи, бидејќи ме претвори во човекот што сум денес! Полека, но сигурно успеав да завршам факултет, да изградам сѐ што сакам и еден по еден да си ги остварувам соништата!

Како е во Битола? Какви чувства ти буди твојот роден град и имаш ли некое твое омилено место?

– Битола е за мерак! Дома си е дома! И не го зборувам ова за да правам лице, мислам дека веќе знаеме дека не сум таков човек. Едноставно ми е убаво! Не дека се сметам за стар човек кога го велам ова, но кога бев помлад и сам, обожавав големи градови. Идејата беше да одам некаде, да направам нешто повеќе. Но, некако периодот на коронавирусот како да ме скроти, па сфатив дека всушност овде е тоа што го барам. Е, сега дали тоа го сфатив заради коронавирусот или заради жена ми – не знам, но битно сфатив!

Ако не грешам, веќе две години си во брак со Милена. Која е Милена? Со што те освои и како почна вашата љубов?

– Така е! На 17 јуни ќе славиме две години брак, но заедно сме точно од пред коронавирусот да ми ги затвори границите и да не заминам на турнеја низ Европа. Коинциденција? – не би рекол. Шега на страна, со Милена првпат се видовме во 2019 година, сосема случајно пазарејќи во еден наш маркет. Една насмевка беше сè што беше потребно. Наскоро потоа се запознавме, па наредниот ден јас заминав да настапувам на Иос, се вратив по неколку месеци, па имав испланирано цела турнеја низ Европа, плус неколку натпревари во Германија и Франција. Ѝ реков дека не планирам да влегувам во врска бидејќи нели – патувања, кариера, не знам кога ќе се вратам итн. Таа на тоа ми рече: „Врска со пејач?! Нема шанса!“. И така, еве по шест години се покажа дека сме „кликнале“ толку добро, што сѐ друго било целосно небитно. И му благодарам на Бог што е така.

Колку тебе те промени бракот?

– Тоа веројатно би требало да ја прашаме Милена. Таа најубаво ме знае пред и потоа. Јас лично сметам дека нема некоја огромна промена, освен тоа што нормално, сум повеќе посветен на градење на нашиот заеднички живот. Инаку, отсекогаш сум бил и одговорен и вреден и сум се трудел да постигнам повеќе, само сега имам уште поголема причина, мотив и желба да направам повеќе!

Се снаоѓаш ли во кујната и дали си од оние мажи кои готват?

– Дефинитивно. Живеев сам 10 години во Скопје, сам со месеци низ Европа, така што сакал јас или не, морав да научам и да готвам и сè друго што треба да знае еден возрасен човек. Е сега, не дека сум некој огромен мераклија да мијам садови или да чистам или пак да правам некои сложени работи. Но, секогаш сум „за“ да вклучам скара, можеби и да спремам некој сос, а во последно време, благодарение на Тикток, експериментирам и со здрави десерти. Секако сум „изгорен“ и за благо.

Кога ќе згаснат камерите, каков си приватно?

– Сите што ме сретнале досега, ми рекле дека сум истиот човек што го гледаат на видеата. И реално, никогаш не сум сакал да глумам нешто што не сум. Кога би сакал, веројатно мојата кариера би имала некаков поинаков тек, но не е тоа – тоа. Сѐ што правам – правам со љубов, на начин на кој јас сакам. Искрено, отворено, без лаги и лажни вредности. Сакам најпрецизно што можам да се доловам себеси во сѐ што правам. И мислам дека токму тоа луѓето го препознаваат.

За крај, омилена книга, патување или филм?

– Омилена е само Милена! Не за џабе е песната. Инаку, во ниедна категорија никогаш не сум имал едно омилено нешто. Јас сум човек што сака да ужива во животот, така што не се ограничувам само на „омилени“ работи. Има прекрасни филмови, книги, храна, места… Евентуално можеби можам да го издвојам Иос, како омилена дестинација за уживање.