Во интервјуто за „Слободен печат“, македонската фолк пејачката Татјана Лазаревска, зборува за новогодишната магија и празниците во Австралија, каде долги години живее со своето семејство. Сепак, вели таа, никаде нема поубава магија за Нова година, од онаа каква ја памети во Македонија…

Влеговме во Новата 2025, по што ќе ја паметиш годинава што измина? Што конкретно тебе ти ја одбележа?

– Изминатата 2024 година ќе ја паметам по прекрасната турнеја во Америка и Канада каде бевме заедно со мојот сопруг Новица Василевски и нашите синови. Поминавме прекрасно време со нашата публика и нашите пријатели.

Украсивте ли дома?

– Оваа година едвај украсивме бидејќи од пред некое време го реновираме домот, па дома беше хаос.

Како е за Нова година во Мелбурн? Како би ја опишала, таа претпразничната и празничната атмосфера?

– Со оглед на тоа дека на оваа страна од светот сега е лето, празничната атмосфера е малку различна, па на пример, Дедо Мраз е во костим за капење. Па така, тука сè е некако летно и опуштено. Мелбурн е преубава метропола и сјае во полн сјај за божиќните и новогодишните празници.

Како ја поминавте оваа Нова година, работно или во домашна атмосфера?

– Ова беше моја 29-та работна Нова година во мојата богата кариера. Пеевме за нашите Македонци во градот Волонгонг.

Овие денови се врзани и за божиќните филмови, дали и ти уживаш во овие филмови и имаш ли некој омилен?

– Јас генерално многу слабо гледам филмови (си го живеам мојот филм), но ако нешто сакам да гледам, тоа се божиќните филмови. Ги гледам во секое годишно време, особено кога летам во авион на подолги дестинации.

Има ли руска салата и кифли и кај вас дома за празниците?

– Овој период бидејќи е лето, градината на Новица е полна со краставици, пиперки и патлиџан, а бидејќи ние ги практикуваме божиќните пости, на нашата трпеза има многу салати и посни јадења.

Време на љубов и подароци… Уживаш ли во подарувањето?

– Секако дека уживам, но ние првенствено си подаруваме љубов секојдневно, а и по некој подарок онака без обврски или повод.

Кога последен пат славеше Нова година во Скопје и во какви сеќавања ти се новогодишните празници во Македонија?

– Сега баш и не можам да се сетам кога последен пат сум славела во Скопје, но во Македонија последната испеана Нова година беше непосредно пред преселувањето во Австралија 2014/2015. Новогодишната магија во Македонија за мене никој не може да ја замени. Зимата и снегот секогаш си имаат посебна убавина.

Имаш ли некоја желба или порака што сакаш да ја споделиш во пресрет за Новата 2025 година?

– Желба имам само една: Сите да сме живи и здрави. А, порака: Слушајте македонска музика.

Кои се плановите за Новата 2025 и приватно и професионално?

За планови многу не размислувам, оставам сè на Бога и на времето, но секако дека сакам да си ја посетам мајка ми и да се видам, да се дружам и да запеам со драги луѓе во Македонија.