Со својата искреност и позитивен дух, македонската инфлуенсерка Софија Јанева успеа да изгради силна врска со илјадници следбеници на социјалните мрежи. Оваа 30-годишна жена сега е пред едно од најголемите животни искуства – мајчинството.

Во искрен разговор за „Слободен печат“, таа откри како се подготвува за породувањето, како бременоста ја промени нејзината перцепција за животот и како социјалните мрежи влијаат врз нејзината улога како идна мајка.

Софија, како се чувствуваш сега, кога породувањето е толку блиску? Дали чувствуваш повеќе возбуда или малку страв пред големиот ден?

– Да бидам искрена, секој ден е полн со мешавина на емоции. Како што се приближувам до денот, чувствувам возбуда, но и малку страв. Тоа е нормално, нели? Стравот е од непознатото, но возбудата е многу поголема – затоа што знам дека ќе бидам мајка на новороденче кое ќе ми го смени текот на целиот живот!

Кои работи најмногу ти помогнаа да се подготвиш за улогата на мајка?

– Подготовката за мајчинството е многу повеќе од купување опрема за бебе. Преку разговорите со други мајки, читањето книги, но и слушањето на сопствената (мајчинска) интуиција што секојдневно расте во мене. Уште пред да останам бремена, сопругот и јас имавме многу отворени разговори, што ми помогнаа да се чувствувам смирено и сигурно, а со тоа и свесно да го направам овој чекор односно да станам мајка. Подготовката е и емоционален процес, не само физички.

Која е најголемата промена што ја почувствува во себе како личност за време на бременоста?

– Бременоста целосно ме промени! Се чувствувам посилно, но и поранливо. Почнав да го ценам секој момент и да разбирам колку е важна љубовта и поддршката од моите најблиски. Го променив процесот на размислување – овој живот веќе не е само мој. Посебно во бременоста, телото буквално го делам со новиот живот што расте во мене, па секоја одлука, почнувајќи од каква храна јадам до какви препарати користам, влијае не само на мене туку и на моето бебе.

Дали има некој посебен момент што ќе го паметиш засекогаш од овој период?

– Секој ден бременоста носи уникатни моменти, но засекогаш ќе го паметам моментот кога Виктор првпат почувствува како се движи нашето бебе. Тоа беше момент на вистинска љубов, кога сфативме дека сме тројца и дека сме започнале едно ново патување како семејство.

Каква улога игра Виктор во овој период и како заедно се подготвувате за новиот живот како родители? Дали бременоста ве зближи уште повеќе како пар?

– Виктор е мојата најголема поддршка, особено во овој период! Бременоста, без сомнение, нè зближи. Заедно го создаваме нашиот нов идентитет како родители, а тоа е нешто навистина магично!

Како се чувствуваш кога сфаќаш дека многумина те гледаат како пример или инспирација за време на бременоста?

– Се чувствувам многу благодарно, но во исто време и одговорно. Да бидеш инспирација за другите е нешто бесценето, но тоа исто така ми создава чувство на одговорност, бидејќи се трудам да ги споделам сите вистински и искрени моменти од овој период. Бременоста и мајчинството се далеку од гламурозни, па затоа секојдневно се трудам да ја пренесам мојата вистинска приказна, а во исто време да понудам и поддршка онаму каде што е потребна, бидејќи според мене тоа е причината за која постојат социјалните медиуми.

Како социјалните мрежи влијаат врз твоето гледиште на мајчинството и бременоста? Дали следиш други инфлуенсерки што споделуваат слични искуства?

– Социјалните мрежи имаат огромно влијание, а тоа може да биде позитивно или негативно. Од една страна, можат да бидат извонредни за споделување искуства и да понудат многу корисни совети, но од друга страна, понекогаш гледаме идеализирани слики што не се реални. Јас, лично, следам мајки што споделуваат искрени и вистински моменти од нивниот живот, а на тој начин се чувствувам помалку осамено – дека не сум единствена што се справува со одредени чувства и проблеми.

Каква порака сакаш да им порачаш на нашите читатели, особено на сите мајки или идни мајки, во овој важен период од твојот живот?

– Мојата порака е едноставна: Не сте сами! Бременоста и мајчинството се патувања што носат предизвици, но и многу радост. Секој ден е уникатен, а понекогаш потребно е да побарате поддршка. Затоа, секогаш можете да ми се обратите со прашања или проблеми, а јас ќе се потрудам да ви помогнам. Секогаш сум тука за да поддржам други мајки и идни мајки, затоа не срамете се да ми пишете.

Што прави денеска: Софија Јанева, економистка и блогерка