Специфичен по својата работа, речиси и да нема утка во парчињата облека кои ги дизајнира, модниот дизајнер Марков е еден од водечките кај нас.

Низ разговорот за „Слободен печат“ со Марков зборуваме за модата, почетоците, соработката со Катарина Ивановска, но открива и која е идеалната комбинација за една жена, љубовта кон шминката и дизајнот…

Кога почнуваше да се занимаваш со оваа професија, очекуваше ли дека ќе имаш посебно место во македонската мода?

– Доколку работите со пасија, љубов, посветеност и сте доследни на себе неизбежно е да го завземете своето место во модата. Кога започнав да дизајнирам имав неверојатна волја да ги реализирам и покажам своите идеи. Во однос на моите очекувања, немав дилеми дека ќе претстојат успеси, верував и сѐ уште сум убеден дека имам што да понудам во светот на модата.

Кога сакаш да ја претставиш својата модна колекција, изборот паѓа на Катарина Ивановска. Зошто?

– Многу е едноставно, доколку имате можност да работите со неа или да присуствувате и да ја набљудувате на сет, ќе ја видите неверојатната професионалност, талент и енергија со која таа зрачи во моментот кога ќе застане пред камера. Јас сум задоволен само со најдоброто, а Катарина е нашиот најдобар модел.

Како почна соработката и дали и приватно сте блиски?

– Се познававме долго време пред да започнам да дизајнирам, но не сме биле блиски или приватно не се дружевме додека не започнавме да соработуваме. Прв поблизок контакт имавме во времето кога рекреативно шминкав додека ги завршував студиите по архитектура, таа ме исконтактира да ја нашминкам за некој настан. Неколку години подоцна ја поканив на мојата прва ревија, на која таа се согласи да присуствува, вечерта по ревијата ја добив најпрекрасната СМС-честитка токму од неа, која никогаш нема да ја заборавам, порака полна со пофалби и охрабрувања кои многу ми значеа. Потоа природно почнавме да комуницираме, приватно да се дружиме и соработуваме, можам да кажам дека сме искрени и блиски пријатели. Неизмерно, бескрајно сум среќен и благодарен на нејзината несебична подршка и на сите фотографии за Марков.

Неколку години работеше како шминкер, како се случи преодот од шминкер во моден креатор?

– Така е, со шминкање реакреативно се занимавав за време на моите студии по архитектура. Генерално работев на креативни едиторијали инспирирани од актуелните светски модни ревии. Всушност, бев првиот кој работеше таков тип на едиторијали за тогашниот магазин „Unique“. Секогаш ме интересирал светот на убавината, до денес за сите свои фотосесии сам го работам мејкапот и стајлингот, кога дизајнирам добивам целосна визија. Кога бев дете, многу сакав да цртам, подоцна посетував часови по сликање, а во средно задолжително ги стилизирав сите мои другарки за вечерните излегувања и на нив се научив да шминкам. За мене мејкапот претставува мода за лицето.

Кое е првото парче облека што го дизајнираше и кога се случи првата ревија?

– Првото парче облека што го дизајнирав беше вечерно асиметрично палто, кое се покажа како многу успешен дизајн. Оттогаш имам изработено повеќе такви палта по нарачка во различни бои и материјали, сѐ уште постои интерес за тој модел. Опседнат сум со палтата, во секоја моја колекција се присутни и би рекол водечки. Првата ревија се случи во октомври 2015 година во музеј на град Скопје. Беше долго очекувана, бидејќи мислам дека сите кои ме познаваа претчувствуваа дека тој момент ќе дојде. Задоволен сум како помина и тие моменти ќе ги паметам додека сум жив.

Од кого доби најголема поддршка?

– Од сите страни. Од, моите родители кои безусловно веруваат во мене и прават сѐ што е во нивна моќ да бидам во можност да ги исполнам своите соништа. Мојата тетка која е моја карпа. Професорот Изет Цури, професионалец, маестро кога станува збор за конструкција на модни парчиња, мој ментор без чие знаење никогаш немаше да бидам тоа што сум. Мојата блиска пријателка Ана, која се пронајде во мојот моден сензибилитет и можам да кажам дека беспрекорно ги носи моите парчиња и им дава живот со нејзината доминантна енергија и самодоверба. Сите останати мои блиски другарки кои ме сакаат, ценат и бодрат.

Што е со предрасудите?

– Кои предрасуди? Особено сум горд што секогаш сум бил достоен на себе покажувајќи самопочит која мислам дека секој еден современ човек треба да ја поседува. Важно е да ја негувате сопствената индивидуалност и да не придавате премногу значење на туѓите зборови. Живејте го животот на свој начин е моето мото.

Како ти се облекуваш приватно и дали имаш време да дизајнираш облека за себе?

– Морам да признам дека пред да станам дизајнер многу повеќе се дотерував, сега повремено и се разбира за некоја прилика сѐ уште знам да се потрудам. За себе мошне малку имам изработено парчиња иако имам милион идеи и желби. Често и дел од тие парчиња кои ќе ги направам за себе, моите клиентки ќе ме видат и побараат за себе. Во една прилика една клиентка ми рече: „Ти си самиот себеси своја најдобра реклама“. Дефинитивно еден од најдобрите комплименти кои сум ги добил.

Имаат ли Македонките вкус за мода?

– Македонките имаат несомнено љубов кон модата, желба за дотерување и предизпозиција со самото тоа за градење добар стил. Сѐ што треба да направат е да внимаваат на префинетоста.

Која е идеалната комбинација за една жена, девојка?

– Дизајнерско палто со Марков потпис, кошула од свилен сатен, фармерки, високи потпетици, уредна фризура, соодветен мејкап, златен накит и црвен маникир.