Младата поп-пејачка, текстописец и композитор, Марија Спасовска успешно ја гради својата музичка кариера. Неодамна на „Макфест“, ја отпеа песната „Страв“, која е нејзино авторско дело. За предизвиците, музиката, кариерата во подем, со Марија разговараме во интервјуто за „Слободен печат“.

Неодамна настапи на „Макфест“ со песната „Страв“, како си задоволна од песната и како е прифатена кај публиката?

– Оваа година настапив по третпат на „Макфест“ и презадоволна сум од целото искуство: настапот, видеоспотот и реакциите на слушателите и гледачите за песната „Страв“. Оваа песна ми е една од омилените песни што сум ги напишала досега и драго ми е што токму на „Макфест“ ѝ ја претставив на публиката.

Која е пораката што ја испрати со оваа песна?

– Мотивот на песната е дека секогаш сакам да бидам опкружена со љубов. Да давам љубов и да добивам љубов.

Кога откри дека имаш талент за пеење и од кого добиваш најголема поддршка?

– Уште од најрана возраст, кога сум имала 4 години, моите родители го препознале мојот талент за музика. Секако од нив и од моите двајца браќа ја добивам најголемата поддршка.

Тешко ли е да се наметнеш на домашната сцена и да се успее кај нас како музичар?

– Да се стигне до успех во која било сфера на животот бара огромна работа, труд и среќа, па во никој случај не е едноставно. Така е и за музиката. Сепак, верувам дека со квалитет и истрајност може да се успее на нашата домашна сцена.

Што правиш во моментот на музичко поле?

– Имам многу планови и идеи што се во процес на реализација. Она што најпрво ми претстои е големиот завршен концерт на проектот „Македонијо во срце те носиме“, кој ќе се одржи во Македонската филхармонија. Исклучително сум возбудена за целиот настан, а особено за тоа што ќе ја испеам „Ој Вардаре“ заедно со оркестар полн од врвни музичари.

Каква е Марија приватно?

– Не сакам вообичаено да давам опис за себе, затоа што тоа е најсубјективното мислење што може да се има и кое само самите можеме целосно да го разбереме. Ако сепак морам да кажам по некој збор, би рекла: спонтана, искрена, насмеана.

Што те прави среќна и што е карактеристично за тебе, а не го знае јавноста?

– Многу работи што ме прават среќна се надвор од очите на јавноста, мислам дека и само така можат да ја имаат таа функција. Нешто што веќе имам споменато, а што не го знае секој е дека сакам премногу спорт. Ме прават среќна фудбалските натпревари на Барселона, особено кога победува.

Колку внимаваш на изгледот и на стилот на облекување? Која ти е омилена комбинација и дали сакаш брендови?

– Внимавам на стилот, но честопати знам да го променам, во зависност од пригодата и расположението. Сакам убава облека, но пред сè, удобна. Сакам и брендови, но не секогаш мора облеката да е бренд за да ја носам и да ми се допаѓа. Омилена комбинација би било сигурно нешто од зимскиот плакар.

Како ја одржуваш убавината?

– Не правам ништо посебно на тоа прашање. Ја сакам природната убавина, таа е онаа што нè прави автентични и свои помеѓу сите. Користам најосновна козметика за нега, а во однос на шминка, употребувам најчесто кога ми е неопходна за настап, снимање или слично.

Со кога најмногу се дружиш од естрадата и кои се идните планови?

– Познавам голем број од пејачите на естрадата и имам супер однос. Би ги издвоила моите колеги од проектот „Македонијо во срце те носиме“ со оглед на тоа што низ турнејата имавме многу заеднички моменти и имав можност да ги запознаам подобро. А, идните планови се секогаш: нова музика.