Катарина Ивановска, македонскиот топ-модел со интернационална кариера, уште како средношколка замина во Њујорк, каде што соработуваше и носеше ревии на едни од најпознатите светски модни дизајнери и брендови. И денес со радост зборува дека „Диор“ ѝ останал при срце, но и животот таму.

Подеднакво убава како на почетоците од кариерата, денес таа е мајка на Вања и Кира кои ѝ се центарот на светот. Со Катарина во интервјуто за „Слободен печат“ зборуваме за она што ја прави среќна, за секојдневието, патувањата, обврските, предизвиците…

Неодамна се врати од Абу Даби, какви се импресиите?

– Абу Даби е место каде што иднината е присутна со сите технолошки достигнувања, притоа нудејќи ни на едно место да уживаме во најквалитетна понуда на забава, гастрономија и рекреативни забавни содржини. Но, искрено јас сум личност што ужива во природа, а таму речиси и ја нема.

Кога сме кај патувањата, колку често сега патуваш заради модните ангажмани?

– Не се сменило многу, сакам да патувам и тоа го правам повеќепати годишно, но сега е многу позабавно каде и да сум, гледајќи ја радоста на моите деца кога откриваат нов дел од светот.

Какви се сега предизвиците во однос на модните ангажмани и колку често си пред објективот на фотоапаратот?

– Јас свесно одбрав да бидам селективна од моментот кога станав мајка. Затоа, по преселбата од Њујорк во Скопје ги задржав најкомерцијалните европски ангажмани и секако за првпат почнав да прифаќам посериозни локални ангажмани кои не бараат отсуства и долги патувања. Јас свесно жртвував највозбудлив дел од младоста за професијата и затоа решив дека нема да го пропуштам мајчинството и времето со моите деца.

Ти недостасува ли времето кога живееше во Њујорк и што најмногу ти буди носталгија?

– Би лажела кога би кажала дека нема ден да не помислам на моето „јаболко“, како што го викам Њујорк. Не ми фали мене професијата таму, туку дружењето и можноста секојдневно да доживееш нешто убаво и сосема ново во секој сегмент на урбаното културно живеење. Ми фалат големиот број пријатели и соработници. И ако не е грев, пак, ќе кажам шопингот на убави работи за една жена во Њујорк е волшебна работа, особено по малите „кул-брендови“ и неверојатните „винтиџ-бутици“.

Да се потсетиме, со кои светски дизајнери соработуваше кога беше дел од модните светски писти и како е да се биде дел од сето тоа?

– Во Париз на Модните недели постојано работев висока мода, така што речиси и да нема бренд со кој не сум соработувала. Горда сум на моите ревии на „Диор“, бидејќи креативноста на тогашниот дизајнер Џон Галијано е толку генијална што тие се сметаат за ненадминливи во историјата на модата. Навистина е огромен списокот на ревии и едиторијали за магазини, среќна сум што се сите документирани на интернет, па понекогаш на ќерка ми Кира ѝ покажувам кога ме прашува што работам.

Колку ти е популарноста некогаш товар во животот и како се справуваш со неа сите овие години?

– Популарноста никогаш не ми била товар во животот. Не се ни чувствувам популарна, туку успешна во мојата кариера. Никогаш не сум се експонирала, ретко ме има во медиуми. Порано потешко се носев со љубоморните коментари, но со текот на времето и со созревањето, сфатив дека јавната професија не е ни најмалку лесна и секој си дозволува да каже или да напише што сака. Веќе не се оптоварувам со тие работи.

Тешко ли е да со одржува убавината и како успеваш постојано да си во топ-форма?

– Дисциплина и работна етика. Јас не престанав со мојата дневна рутина, која не е ниту малку лесна. Грижата за моето тело, кожата и здравјето е и грижа за мојата професија. Верувајте, за добар изглед на секоја жена која не мора да биде и јавно експонирана доволно е една третина од моите спортски активности и козметички третмани, но и тие да бидат редовни без ескивирање, кое ете јас лично, не смеам да си го дозволам.

Мајка на Вања и Кира… никогаш не те прашав дали си строга и како успеваш по дома да доведеш сè во ред?

– Моите деца не се поинакви од нивните другарчиња. Немам потреба да сум нешто многу строга од проста причина, тие имаат толку многу активности и исполнето време со дружење, она што мене ми останува е многу љубов и одговарање на преку милион прашања дневно. Инаку, моите деца се смируваат веднаш штом и малку се налутам, којзнае колку страшно им изгледам (хахаха). Јас ретко стигнувам до моментот да сум строга, бидејќи сум малку здодевна мајка кога станува збор за вербалното објаснување на работите кои не се коректни во однесувањето.

Колку често си во кујната и што најмногу готвиш? Имаш ли некој омилен рецепт?

– Готвам јадења кои се здрави и најчесто медитерански. Сакам и инсистирам децата да уживаат во домашна храна. Но, признавам дека сакаме да јадеме во нашите ресторани кои мене ми се омилени од најраната младост.

Омилена книга или филм за кој секогаш со радост зборуваш?

Филм кој ме остави без здив е „Тар“ со Кејт Бланшет затоа што зборува за проклетството на успехот и нарцисоидноста на најуспешните. А, во моментов ја читам биографијата на Бој Џорџ со наслов „Карма“ која е презабавна и полна со приказни за славните во лудите осумдесетти.

Што те прави среќна, а што може да те извади од такт?

Среќна ме прават децата и здравјето и мирот на моите сакани. Среќна ме прави и можноста сè уште да одбирам што ќе работам. Од такт може да ме извади лага и нелојалност.