Иван Јованов, вокалистот на „Либеро бенд“, неодамна направи крштевка на својата ќерка Ниа. Во семејна атмосфера, во манастирот Св. Јован Бигорски, вели дека било незаборавно чувство, додека ја крштевале ќерката.

Иван во интервјуто за „Слободен печат“ вели дека ужива во улогата на татко и сопруг, а во однос на музиката, со бендот ги очекуваат многу настапи и нови предизвици…

Пред неколку денови правевте крштевка на ќерката Ниа. Зошто го избравте манастирот Св. Јован Бигорски и како помина целиот чин?

– Манастирот Св. Јован Бигорски според мене е едно од најубавите места во Македонија, мирот што таму можете да го почувствувате, не можете на ниту едно друго место. Јас и мојата фамилија многу често го посетуваме и некако ни стана храм за сè што ни значи, за сè што славиме. Самиот чин на крштевање помина вообичаено, бевме само најблиските, кумовите и старосватицата и навистина го доживеавме како еден свет чин. Ниа супер се носеше со целата ситуација.

Интересно е што решивте со сопругата исто да се облечете. Чија беше идејата? Дали сте од оние двојки што се усогласуваат во облекувањето?

– Идејата беше на Ивана, бевме усогласени во една лежерна шик варијанта, соодветна за поводот и за местото. Инаку, главно не сме од оние двојки што се „униформираат“ во секоја пригода, во иста боја и слично.

Ќерката Ниа наполни 3 месеци. Како се снаоѓаш во улогата на татко? Колку помагаш по дома и грижата околу бебето?

– Ова е најчесто поставуваното прашање деновиве. Веројатно не ви изгледам како некој што знае да смени пелена, да го искапе бебето или да ја заспие кога тоа е потребно!? Морам да ви кажам дека сте во заблуда (хахаха), совршено ги правам сите овие работи.

Колку те промени татковството и дали сега со раѓањето на Ниа ти се смени целиот биоритам? Како ги усогласуваш обврските, музички и домашни?

– Татковството ме промени во секоја смисла на зборот, но најмногу во тоа што ме направи најсреќниот човек на планетава. Чувството е прекрасно, па така забораваш дека биоритамот пополека, но сигурно ти се менува, особено наутро. Едноставно е да се усогласат обврските со добар план и распоред. Ние имаме многу однапред закажани настапи и немам проблем да го испланирам времето. Ивана е многу посветена мајка и секогаш се надополнуваме, така што не трпи ниту работата ниту домашните обврски.

Ниа е ретко и необично име… од каде идејата, чија беше желбата и какво значење има?

– Идејата за реткото и необично име е на Ивана, многу одамна уште пред ние двајца да бидеме заедно. Сакавме име што нема погрешно да биде изговарано или скратувано, а истовремено и што ќе биде уникатно. Инаку, потекнува од староирското име Ниам, што значи „светлина“, а дека таа е навистина нашата светлина, тоа не треба ни да се споменува.

Колку во она што го работиш Ивана ти е поддршка? Со што те освои таа и како почна вашата љубовна приказна?

– Како што споменав и погоре, Ивана е прекрасна и како мајка и како партнерка, има целосно разбирање за мојата работа, затоа што таа од почетокот знаеше каква е мојата професија, што дава и што одзема, како, на пример, слободните вечери и ноќи, нив помалку ги имаме, но затоа пак, надоместуваме преку ден. А како ме освои? Ме освои со енергијата, со насмевката, со безрезервната доверба што ја има во мене, и секако, не најмалку важно, со убавината.

Тешко ли е да се биде популарен на домашната сцена и од каде љубовта кон музиката?

– За наши услови, да, можам да кажам дека не е лесно. Потребно е многу труд, работа, многу непроспиени ноќи, постојаност во она што го работите и секако квалитет. Потоа, некако немаш спокој, секој чекор ти е под лупата на јавноста, сè што ќе направиш најчесто се толкува онака како што им одговара на оние што го виделе тоа и тука нели малку „се крши филмот“. А, љубовта кон музиката ја имам уште од мали нозе, едноставно имав слух за тоа и се случи.

Очекуваше ли дека со „Либеро бенд“ ќе станете еден од најпопуларните бендови во Македонија, особено кога станува збор за избор на музика за свадба?

– Секако, кога нешто работиш сериозно и со посветеност, тоа го правиш со цел да бидеш најдобар, а ние силно итаме кон таа цел секојдневно. Очекувањата ни се исполнети, „Либеро бенд“ е веќе најпопуларен бенд во Македонија, особено кога станува збор за избор на музика за свадба. Резервирани сме до крајот на годината, немаме ниту еден слободен термин, а мислам дека тоа говори многу за тоа колку сме најпопуларни.

Може ли да се живее од музика во Македонија и кои се идните музички планови?

– Може да се живее од сè доколку се работи, но ние Македонците некако си избираме „шорткат“, да не работиме многу, а да имаме многу пари (хаха). Работиме многу, немаме слободни денови и задоволни сме од тоа што го добиваме за возврат, особено од посветеноста на нашата публика, која е секогаш расположена да присуствува на нашите настапи.
За идните планови, да оставиме нешто да биде и изненадување, за некое следно интервју…