Српската поп-пејачка Гоца Тржан вели дека нејзината борба за потомство сѐ уште трае – таа и сопругот Радомир Раша Новаковиќ се надеваат дека наскоро ќе успејат да станат родители.

Тржан има ќерка од првиот брак, Лена, која има 16 години, а наскоро со Раша ќе прослават осум години брак. Токму со сопругот, Гоца беше во Охрид, како гостинка на фестивалот „Охрид фест“.

Раша, како најголема поддршка на Гоца, ја снимаше својата сакана за време на нејзиниот настап со песната „Мирно“, која ја испеа во дует со Стефан Здравковиќ – Принц.

– Последен пат кога бев во Охрид, тоа беше со покојниот Тоше. Тој тогаш уште беше жив и имавме концерт за Илинден во Крушево. Потоа дојдовме тука, и поминавме два-три незаборавни дена. Ете, додека да се свртиш, поминале 16-17 години – ни раскажа Гоца Тржан во Охрид.

Еден од најголемите хитови на Тоше, а и на Гоца, е дуетот „1200 милји“, кој е снимен и на македонски и на српски јазик.

– Дојдов овде со сопругот. Тој е за првпат во Охрид и морав да му го покажам ова магично место. Тука се чувствувам како да сум на море, само што е малку постудено. По фестивалот, имав шанса да прошетам до Свети Наум, до изворите на Дрим и на уште неколку прекрасни места кои и Раша требаше да ги види. Толку е убав Охрид, тоа е чудо едно – ни раскажа Гоца.

Во последно време медиумите, особено во Србија, многу пишуваат за приватниот живот на Гоца, особено откакo беа на една клиника во Прага, на вештачко оплодување. Тржан пред две години изјави дека не е сигурна дали сака да се обиде повторно да имаат дете и оти е изморена.

Во тој период, Гоца објави едно иронично видео во кое сопругот ја снима низ улиците на Прага, а е во улога на водител и ја прашува дали забременила. Тржан на ова му одговара да ја остави на мира, со повулгарни зборови.

За невистините кои се објавуваат во медиумите за неа, таа ни изјави:

– Не ги читам сите работи кои се пишуваат за мене, тоа не ме интересира многу. Знаеш како велат: „И на оградата пишува сешто, па не туркаш“. Затоа научив дека најлошото нешто кое можам да го направам е демант. Затоа што со демант само ја продолжуваш агонијата, само го продлабочуваш проблемот. Вака ми е многу полесно, да не читам и да не ме интересира. Луѓето и онака ќе го мислат она што го сакаат. На мене ми е најважно мојата околина и моите блиски да ја знаат вистината – ни раскажа Гоца Тржан.

За 16- годишната ќерка Лена, Гоца вели дека е многу горда на неа и дека во некои делови од карактерот на ќерка си – се препознава себеси.

– Таа е многу попаметна од мене, многу повнимателна. Таа е голем борец, многу сум горда на неа. Многу е смирена, претпазлива. Фала му на Господ, поубава е од мене, поубаво е градена. Така што, сѐ е како што треба – вели Гоца.

Што се однесува до нејзината борба да роди уште едно дете, Гоца на ова прашање ни одговори кусо:

– Борбата да станеме родители сѐ уште трае, секоја борба за сите можни нешта во мојот живот засекогаш ќе трае – ни рече Тржан.

За песната која ја испеа на фестивалот во Охрид вели дека ја обожава, а авторот Душан Бачиќ ја напишал специјално за неа и за Принц.

– Убаво помина оваа песна, доста се слуша, доста се пушта, затоа што е нежна, не е агресивна, не е воопшто како песните од ова денешно време – искрена е Гоца.