Продолжуваме со промовирањето на младите македонски спортисти кои се желни за добри резултати, успеси, а меѓу нив е кајакарот Благој Гугинов. Членот на Кајак Кану Клубот „Арка Борец – Велес“ оствари успеси на Државното првенство за сениори, пионери и јуниори.

К.К.К. „Арка Борец – Велес“ најпрвин дојде до титулата шампион на Државното јуниорско првенство на Македонија во кајак спуст на диви води. Во Класик 3 километри во машка конкуренција првото место го освои Кристијан Лазаров, пред Благој Гугинов, кои се двајца репрезентативци до 18 години, а двајцата доминираа и во спринт 300 м.

Гугинов беше првопласиран на Државното пионерско првенство во спринт, како и во тимскиот настап заедно со Андреј Апостолов и Филип Димитриевски.

Арка-Борец Велес е државен шампион на Македонија во кајак спуст на диви води

Кој беше главниот мотив да бидеш дел од кајакот, како се одлучи да бидеш дел од овој спорт?

– Се заинтересирав гледајќи на телевизија други кајакари како успешно се справуваат со дивите и мирните води. И посакав да пробам и јас.

Што за тебе претставува кајакот и колку тој бара континуитет и истрајност?

– Кајакот за мене претставува веќе дел од секојдневниот живот, бидејќи тренинзите се секој ден од неделата.

Кажи ни нешто повеќе за Кајак Кану Клубот Арка Борец – Велес, дали се обезбедуваат потребните тренинзи?

– Клубот постои од 2008 година и ни е обезбедена потребната опрема за тренинзи и натпревари.

Учествуваше на Државното првенство на Македонија (сениори, пионери, јуниори), доминација на Арка Борец – Велес, колку си задоволен од настапот?

– Со оглед дека во пионери освоив прво место, а во јуниори второ место, јас сум презадоволен од постигнатиот резултат.

Кои се твоите досега најдраги успеси на домашен и меѓународен план?

– На домашен терен е освоеното прво место на Државно првенство на Македонија, а меѓународно во Србија, каде исто така освоив прво место во групата на пионери.

Арка Борец Велес е државен јуниорски шампион на Македонија во кајак спуст на диви води

Како изгледа еден твој обичен ден, секако тука е и образованието. Дали се занимаваш рекреативно и со друг спорт?

– Покрај секојдневните обврски на училиште во текот на денот наоѓам време и за еден тренинг, а во преостанатото слободно време возам велосипед и го шетам моето куче.

Што според тебе треба да го краси еден кајакар, за да успее да дојде до победничкиот подиум?

– За успешност во нашиот спорт потребна е упорност и истрајност.

Кои се целите, твоите желби кои сакаш да ги исполниш во иднина со клубот и секако на репрезентативен план?

– Желбата ми е да ја задржам успешноста и во другите категории (јуниори и кадети), кога за тоа ќе дојде време.