Од 17 мај, авионите на скопскиот аеродром ќе слетуват на рехабилитирана писта. Првиот човек на компанијата,„ТАВ Македонија“, Метин Батак, вели дека независно од економската состојба, време е пистата да се рехабилитира. Тој, и покрај пандемијата и меѓународната политичка и економска состојба е оптимист за престојната сезона за патување. Батак вели дека секоја глобална криза е предизвик за авијацијата, но некогаш може да отвори и нови можности.

Најавивте реновирање на пистата на аеродромот. Инвестициите во ова време се особено драгоцени. Може ли да ни откриете нешто поконкретно – колку пари ќе бидат потрошени и дали ќе се ангажираат домашни компании?

– Рехабилитацијата на пистата на Меѓународниот аеродром „Скопје“ ќе чини околу 7,5 милиони евра. Главен изведувач на градежните работи е компанијата „ТАВ Констракшн“. Станува збор за истата компанија којашто ја изгради терминалната зграда на скопскиот аеродром, кога ТАВ го презеде управувањето со македонските аеродроми во 2010 година. Главниот подизведувач на „ТАВ“ констракшн“, ќе биде грузиска компанија и тие веќе имаат ангажирано неколку локални подизведувачи од Македонија.

Што значи за самиот аеродром реновирањето на пистата и како тоа ќе се одвива, ќе има ли застој во авиосообраќајот?

– По одреден временски период, горниот слој на асфалтот, површината на секоја писта, старее и има потреба од санација. На скопскиот аеродром сега дојде времето за рехабилитација. Одлуката ја донесовме во консултација со сите авиокомпании кои летаат од скопскиот аеродром, како и со Министерството за транспорт и врски, Агенцијата за цивилно воздухопловство, М-НАВ и другите даватели на услуги.

Работите ќе се спроведуваат во согласност со меѓународните стандарди и препораки од Меѓународната организација за цивилно воздухопловство. Практично, ќе го реновираме само горниот слој на асфалтот на пистата, која е долга 2.950 метри и широка 45 метри. Секој ден од 9 до 17 часот, од 28 март до 16 мај 2022 година, ќе рехабилитираме по еден дел од вкупната должина на пистата, со цел аеродромот да остане во функција. Доколку го затворевме во целост аеродромот, градежните работи ќе се одвиваа во текот на 24 часа, а рехабилитацијата ќе траеше пократко. Сепак, одлучивме зафатот да трае 50 дена, токму со цел да нема стопирање на авиосообраќајот.

За патниците остануваат да важат правилата воведени во контекст на ковид, односно да пристигнат 3-4 часа порано на аеродромот.

Иако во моментов се неблагодарни какви било прогнози, какви се вашите очекувања за претстојната туристичка сезона?

– Минатата година, и на скопскиот и на охридскиот аеродром, ги забележавме првите знаци за закрепнување на авиосообраќајот од почетокот на ковид-кризата, особено за време на шпицот на летната сезона, кога европските земји привремено ги укинаа забраната за патување за носителите на македонски пасоши.

Динамиката на закрепнувањето на авиосообраќајот е променлива и досега беше подложна на сите нови бранови на пандемијата. Од една страна, многу земји ги тргнаа, или се во процес на тргање на нивните рестрикции за патување, а од друга страна во моментов светот е засегнат и од глобалните политички случувања и од економските текови. Сето тоа може да има влијание, но лично сум оптимист и се надевам дека нема да има ескалација и дека процесот на закрепнување ќе продолжи уште поинтензивно во претстојната туристичка сезона.

Во интерес на аеродромите е да се привлечат што повеќе авиокомпании со повеќе летови. Какви се Вашите сознанија за нови летови, и дали е можно во ова криза да се привлече некоја нова авиокомпанија?

– Секоја глобална криза е предизвик за авијацијата, но некогаш може да отвори и нови можности. Глобалните промени што се случуваат внатре кај авиокомпаниите, ги тераат да бараат нови пазари и да ја прошируваат мрежата на нивните дестинации. Оттука, ние постојано работиме да привлечеме нови авиокомпании на македонскиот пазар и да го прошириме бројот на дестинации до кои летаат постоечките авиокомпании, од двата аеродрома, во Скопје и во Охрид. На овој начин, лани во ноември, нова авиокомпанија, „Изиџет“, влезе на македонскиот пазар со отворање на линијата Женева-Скопје. Во моментов, немаме други најави за нови авиокомпании и нови авиолинии. Штом имаме, ќе ја известиме јавноста.

Што покажува Вашата статистика – на која линија има најмногу патници?

– Статистиката за авиосообраќајот на ТАВ Македонија покажува дека во првите два месеци од 2022 година, најфрекфентна дестинација од Меѓународниот аеродром „Скопје“ е Истанбул со пазарен удел од 15,9 проценти, а потоа следуваат Базел со 8,8 проценти пазарен удел, Цирих со 7,6, Виена со 5,9, Дортмунд со 5,8, Минхен (Меминген) со 4,8 и Келн со 3,8 проценти. Во однос на држави, топ 5 земји со најмногу директни летови се Германија, Швајцарија, Турција, Шведска и Австрија.

Наградите ни се признание за посветноста

Наградите и признанијата се потврда за посветеноста на ТАВ Македонија кон авиопревозниците, патниците и кон останатите чинители во авиосообраќајот, вели Метин Батак, генерален директор на ТАВ Македонија.

– Оваа година, Меѓународниот aеродром „Скопје“ по седми пат е добитник на престижната Награда за квалитет на аеродромските услуги, која се доделува од страна на Меѓународниот совет на аеродроми и притоа наградени сме како најдобар аеродром во својата големина и регион (2 до 5 милиони патници годишно во Европа. Исто така, втора година по ред, ја добиваме наградата за “Најдобри хиегиенски мерки во регионот Европа”. Иницијативата ACI-ASQ е глобална програма за рангирање и мерење на задоволството на патниците додека тие се на аеродромот. Се спроведува на близу 400 аеродроми во светот. Горди сме што тие ги признава анашите секојдневни заложби за обезбедување на најдобри можни услуги и задоволување на потребите на нашите клиенти. Нивното задоволство ќе остане една од нашите главни цели – вели Батак.