Ивана Гакидова ги брани боите на најдобрата македонска женска репрезентација и моментно е дел од женскиот српски ракометен клуб Наиса каде што настапува уште една наша ракометарка, Симона Стојановска.

Претходно Гакидова играше за ЖРК Металург, ЖРК Вардар, Баник Мост (Чешка) со кој беше шампион во таа земја, Молде (Норвешка), француските клубови АСПТТ Стразбург и Стела Сен Маур.

Ексклузивно за веб изданието на „Слободен печат“ зборуваше за самите почетоци во овој спорт, нејзините досегашни најголеми успеси, колкава е одговорноста како пивот, очекувањата на репрезентативен план, повеќе прочитајте во продолжение.

Кога и како започна љубовта кон ракометот, кои беа првите чекори?

– Периодот кога ми се допадна ракометот и го забележав беше моментот кога Кометал Ѓорче Петров ја освои титулата во Лигата на шампионите. После некоја година забележав дека во моето школо се отвора школа на Кастратовиќ во која и ги започнав моите први чекори.

Ги браните боите на српскиот женски ракометен клуб Наиса, во чии редови секако игра и Симона Стојановска, колку сте задоволни од досегашните настапи и какви се очекувањата за оваа сезона?

– Оваа сезона можеби и најмногу виновна за тоа што сум во ЖРК Наиса е и Симона Стојановска. Задоволни сме до сега со исходот од девет одиграни натпревари и исто толку победи. Учествуваме и во ЕХФ Купот во кој стигнавме до осминафинале и ќе играме со екипата на Малага во јануари. Очекувањата се дефинитивно титула во Српското првенство како и во купот, и што подалечен пласман во ЕХФ купот па зошто не и до титула.

Кои се вашите најголеми успеси во професионалната кариера, кој трофеј ви е најдраг?

– Најголеми успеси во мојата кариера до сега можам да ги издвојам бронзениот медал во Лигата на шампионите со ЖРК Вардар и освојувањето на титула во Чешкото првенство.

Можете ли да го споредите ракометот во Македонија и во странство, од аспект на условите, тренинзите, а секако и вложувањето, промовирањето на овој спорт?

– Многу е тешко да се спореди затоа што имаат тотално друг принцип на работа, услови и вложувања во кои мислам дека многу заостануваме. Многу вложуваат во младите играчи и многу се работи уште од најмала возраст со нив на скоро едно професионално ниво и во многу професионални услови.

Дали отсекогаш била желбата да играте на позицијата пивот и колку истата бара одговорност во текот на натпреварите?

– Пивот станав бидејќи мојот тренер Зоран Кастратовиќ почна да ме става на таа позиција во која и најдобро се снаоѓав. Во ракометот секоја позиција бара голема одговорност, но позицијата пивот бара поголема физичка спремност.

Во квалификациите за Светското првенство 2021 Македонија е домаќин на турнирот со Грција, Исланд и Литванија, мечевите се планирани за март, како гледате на шансите, првите две одат во баражот?

– Со оглед на тоа што сме домаќини на тој турнир, но мислам дека и веќе зрели играчи ни дава предност да бидеме на чекор до пласманот на Светското првенство.

Нашата земја заедно со Словенија и Црна Гора ќе бидат домаќини на наредното Европско првенство 2022, едно ваше видување на тој настан и можноста да се промовира уште подобро македонскиот женски ракомет?

– Многу сме среќни што ќе имаме шанса да учествуваме во едно големо натпреварување, тоа е се разбира голема шанса за промоција на македонскиот ракомет како и за сите играчи. Се надевам дека ќе успееме да се избориме за што повисок пласман на истото.

Која е најголемата поддршка во вашата спортска приказна и животот?

– Мојата најголема поддршка е моето семејство, како и најблиските луѓе во мојот живот.

Покрај ракометот, дали рекреативно се занимавате со други спортови, или да одвоите како хоби, воедно професија која планирате да ја водите во иднина?

– Во слободно време сакам да патувам и да поминувам повеќе време со моите пријатели. Сакам да прочитам и по некоја книга, моментално спремам магистерски труд во областа на маркетинг менаџментот и се надевам дека во иднина би работела нешто поврзано со тоа. Со оглед на тоа дека скоро цела година сум професионално активна во ракометот и немам баш многу слободно време, не се занимавам со друг спорт рекреативно и кога имам слободно време гледам што повеќе да се одморам и уживам со моите најблиски.

Што според вас треба да го краси еден ракометар, воопшто спортист за да може да се надева на успех, да верува во добар резултат?

– Според мене да бидеш успешен и добар спортист пред сѐ бара откажувања од многу работи, како и многу голема дисциплина, карактер и вложување во самиот себе, голема посветеност и труд и понекогаш малку среќа..

И за крај, со оглед и на неизвесната ситуација со ковид-19, здравјето секогаш било и ќе биде приоритет, како гледате во новата 2021 година?

– Се надевам дека што побрзо ќе заврши пандемијата и животот ќе се врати на старо, оваа пандемија колку што беше негативна, мислам дека донесе и многу позитивни работи. Здравјето е секогаш на прво место и чувајте се сите.