Атлетичарот Андреас Трајковски (28), роден во Копенхаген, доби дозвола од Светската атлетска федерација (ИААФ) да настапува за Македонија. Ова го потврди Трајковски и неговиот матичен клуб Работнички.

Дел од својот живот го помина во Данска доби дозвола да настапува под знамето на Македонија со што нашата атлетика доби уште еден кандидат за настап на Олимпијада, следните Летни олимписки игри се во Париз 2024. Настапува во дисциплината скок во далечина, негов личен рекорд е 7,83 метри на отворено, а има и настапи на 100 метри.

Атлетскиот клуб Работнички соопшти дека сте добиле дозвола од Светската атлетска федерација дека може да настапувате за македонската репрезентација. Што значи овој момент за вас да се бранат боите на една земја?

– Тоа ми значи сè! Го чекав овој момент долго време, но среќен сум што процесот конечно заврши. Многу сум возбуден што ќе ја претставувам Македонија и се надевам дека ќе го направам тоа на 5 март на Балканското првенство во Истанбул, Турција.

Настапувате во дисциплината скок во далечина, кој е вашиот личен рекорд и каде го постигнавте овој резултат?

– Да, мојот рекорд е 7,83 метри на отворено, што го направив на Данското национално првенство минатото лето во 2021 година.

Кој е вашиот најдраг успех досега во натпреварувањата?

– Имам многу, но мојот омилен успех е освојувањето на сребрен медал на Светското првенство до 20 години во 2012 година.

Како течат подготовките за новите настапи кои ве очекуваат во следниот период?

– Моите подготовки досега ми одат одлично. Прескокнав минатиот викенд 7,63 метри, што е моментално 30-ти најдобар скок оваа година во Европскиот ранкинг. Никогаш досега не сум скокнал толку далеку во сала во Европа, што ми дава самодоверба за следните натпревари.

Која е вашата најголема поддршка во животот на патот кон успесите?

– Татко ми Срѓан Трајковски и мајка ми Хеле Соренсен. Отсекогаш беа тука за мене уште од раѓањето и ми покажаа огромна поддршка низ годините. И во лоши и во добри времиња.

Според вас, што треба да го краси еден атлетичар, воопшто спортист за да може да се надева и верува во добар резултат?

– Најважно е спортистот да работи напорно и да има верба во себе. Талентот исто така игра огромна улога, но верувам дека напорната работа го победува талентот во многу делови.

Условите за тренирање се исто така многу важни и мислам дека инфраструктурата во Скопје мора да се подобри за да има повеќе спортисти во атлетиката. Треба да има подобри услови за спортистите и затоа треба да се изгради атлетски објект на отворено и затворено.